«Ազատ հայրենիք» կուսակցության եւ «Արցախի ժողովրդավարական կուսակցության» կուսակցապետերի կնքած հուշագիրը չի կարող առաջընթաց հաղորդել պետության կառավարման համակարգին, որովհետեւ այն ընդամենը ամփոփեց իրենց զբաղեցրած պետական պաշտոնները պահպանելու ծրագիրը։
Մենք կարեւոր ենք համարում Արթուր Թովմասյանի հրապարակած տեղեկությունը, որ ԼՂՀ նախագահը առաջարկ էր արել Արայիկ Հարությունյանին` գլխավորել Ազգային Ժողովը։
Գտնում ենք, որ խորհրդարանական ընտրություններից հետո նոր կառավարություն ձեւավորելու անհրաժեշտությունը թելադրված է արտաքին եւ ներքին օբյեկտիվ գործոններով․
2014թ․ սկսած, Արցախի համար էապես փոխվել է քաղաքական եւ տնտեսական միջավայրը՝ արտաքին հարաբերությունների ոլորտում առաջացել են նոր վտանգներ եւ, միաժամանակ, ի հայտ են եկել նոր հնարավորություններ։ Ուստի երկրի հետագա զարգացումն այլեւս չի կարող մեծապես կախված լինել Հայաստանի հետ հարաբերություններից։
Ֆինանասատնտեսական ոլորտում հասունացող ճգնաժամը թելադրում է բյուջետային եւ դրամավարկային քաղաքականության արմատական վերանայում։
Հանրության հավանությանը չարժանացած, արտաքին միջամտության վրա հենված ցանկացած քաղաքական համաձայնություն ընդամենը ավազի վրա կառուցված շինություն է։ Միայն ազգային շահերով առաջնորդվող, ժողովրդի վստահությունը ձեռք բերած պատգամավորն է ի զորու է վերացնել նման համաձայնագրի քաղաքական պոտենցիալի մասին միֆը՝ գործարքի վրա հենված ծրագրերին անվստահություն հայտնելու միջոցով։
Նման իրավիճակներում Սահմանադրությունն է այն հենարանը, որի հիմքի վրա պետության ղեկավարը կարող է իր շուրջը համախմբել բոլոր քաղաքական եւ հասարակական ուժերին՝ հանրային վստահության կառավարություն ձեւավորելու հարցում։
«Խաղաղություն եւ զարգացում» կուսակցություն
22 մայիսի, 2015թ․
ք․ Ստեփանակերտ
