«ՆԱՏՕ-ի գործընկերության քաղաքականությունը որեւէ մեկի դեմ ուղղված չէ: Վերջին քսան տարիներին ՌԴ-ն էլ ՆԱՏՕ-ի գործընկերն է եղել»,- այսօր, Երեւանում, ՆԱՏՕ-ի տեղեկատվական կենտրոնում հրավիրված մամուլի ասուլիսում հայտարարեց Գերմանիայի ԱԳՆ ՆԱՏՕ-ի բաժնի ղեկավար Յասպեր Վիկը: Հունվարի մեկից, հիշեցնենք, ՀՀ-ում ՆԱՏՕ-ի կոնտակտային դեսպանության գործառույթը Գերմանիան է ստանձնել:
Aravot.am-ը հիշեցրեց, որ ամսի 15-18-ը Բրյուսելում կայացած ՆԱՏՕ-ի խորհրդարանական վեհաժողովն ակնհայտ հակառուսական է եղել, դրա մասին պատմեցին հայ խորհրդարանականները ովքեր մասնակցել էին վեհաժողովին: Այնտեղ անգամ ԼՂՀ հարցի մասին է խոսվել , ներկայացնելով, որ հակամարտության հրահրողը բացառապես Ռուսաստանն է եղել իր ժամանակին եւ այժմ էլ բացառապես ՌԴ-ն է խոչընդոտում հարցի խաղաղ կարգավորմանը: Հայ պատգամավորների ըմբոստացմանն ի պատասխան ասվել է, որ իրենց խնդիրը ՌԴ-ի բացասական դերակատարման ընդգծումն է բացառապես: Բանախոսից հետաքրքրվեցինք` ՆԱՏՕ-ի օրակարգում ամեն գնով, անգամ փաստերն ակնհայտ խեղաթյուրելով, ՌԴ-ին ծնկի բերելու հա՞րցն է:
Յասպեր Վիկի պատասխանը` տեսանյութում
Կարդացեք նաև
Ասուլիսին մասնակցող Հարավային Կովկասում ՆԱՏՕ-ի կապի սպա Ուիլյամ Լահուն էլ ուշադրություն հրավիրեց այն հանգամանքին, որ խորհրդարանական վեհաժողովը ՆԱՏՕ-ի մաս չի կազմում: Այն առանձին, անկախ կազմակերպություն է, որը կազմված է ՆԱՏՕ-ի անդամ երկրների խորհրդարաններից, ներկայացված են նաեւ գործընկերներ պետությունների խորհրդարանական պատվիրակությունները:
Մեր հարցին`ՌԴ-ին ծնկի բերելու մասով էլ ասաց, որ ՆԱՏՕ-ի գործելաոճն է`համագործակցություն ինքնիշխան պետությունների հետ, ինչն ուղղված է նրան, որ բարելավվի տվյալ երկրների անվտանգության եւ դաշինքի անվտանգության մակարդակը: «Այս գործընկերությունները չեն դիտարկվում ՌԴ շահեր ոսպնյակով, դրանք ինքնիշխան պետությունների որոշումներ են»,- ասաց ՆԱՏՕ-ի պաշտոնյան:
Նելլի ԳՐԻԳՈՐՅԱՆ
