Ըստ Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանի՝ կրոնական մի շարք կառույցների գործունեությունը Հայաստանում վաղուց պետք է կասեցված լիներ, մինչդեռ մեր կառավարությունը ոչինչ չի անում այդ ուղղությամբ:
«Խղճի ազատության ու կրոնական կազմակերպությունների» մասին ՀՀ օրենքում հստակ նշվում է, որ եթե կառույցը ֆինանսավորվում է արտասահմանում գտնվող մայր կառույցից, ապա պետք է դրա գործունեությունը կասեցվի»,- այսօր լրագրողների հետ հանդիպման ժամանակ ասաց Ա. Ամարյանը:
Հարցին՝ ո՞րն է պատճառը, որ մեր կառավարությունը խուսափում է կասեցնել այդ կառույցների գործունեությունը: Արդյո՞ք մեր կառավարությունում և պետական մարմիններում էլ աղանդավորական կառույցների հետևորդներ կան, և խուսափելու պատճառներից մեկը դա է, Ա. Ամարյանը պատասխանեց, որ Հայաստանի պետական բոլոր մարմիններում էլ աղանդավորականներ կան, բայց մեկ այլ խնդիր էլ կա. այս հարցում, նրա խոսքով, կառավարության վրա ճնշում է գործադրում նաև Եվրամիությունը:
«Երեկ մի բան ինձ ուրախացրեց, բայց շատ եմ ափսոսում, որ Հայաստանի համար չէր,- հավելեց Ա. Ամարյանը.- Ռուսաստանն օրենք ընդունեց, որի համաձայն՝ այն ՀԿ-ները, որոնց մայր կառույցները գտնվում են արտասահմանում և հակապետական, հակահասարակական գործունեություն են ծավալում, պետք է փակվեն, իսկ այն մարդիկ, որոնք դրանից հետո էլ կշարունակեն հարել տվյալ կառույցին, կտուգանվեն:
Կարդացեք նաև
Մարդիկ մտածում են իրենց պետականության, իրենց ազգային անվտանգության մասին: Իսկ մեզ մոտ այդպիսի օրենք հազիվ թե ընդունվի: Չնայած նրան, որ դրա անհրաժեշտությունը կա, որովհետև Հայաստանում գործող արտասահմանյան բազմաթիվ կառույցներ աշխատում են մեր ինքնության, ազգային եսի ոչնչացման ուղղությամբ»:
Պատասխանելով Aravot.am-ի հարցին՝ արդյոք վերջին շրջանում նոր աղանդներ ի հայտ եկե՞լ են՝ Քայքայիչ պաշտամունքներից տուժածների օգնության և վերականգնողական կենտրոնի ղեկավարը հայտնեց, որ վերջերս Հայաստանում նոր ու առաջին հայկական աղանդավորական կառույցն է ձևավորվել. «Կոչվում է Ուղղադավան ավետարանական եկեղեցի: Ղեկավարը Ավետարանական եկեղեցու նախկին հովիվ Արմեն Միքայելյանն է: Ունի երկու հարյուր անդամ: Կառույցի գրանցվելուց հետո ես կարդացել եմ նրանց կանոնադրությունը, որտեղ հստակ նշված է, որ չեն ֆինանսավորվելու արտասահմանից, իրենք իրենց միջոցներով են գոյատևելու: Լավ է գոնե, որ դեմ են դրսից ֆինանսավորվելուն»,- ասաց Ա. Ամարյանը՝ հավելելով, որ նորաբաց այս կառույցի կողմից դեռևս վատ բաներ չի նկատել:
Սիրանուշ ՀԱՅՐԱՊԵՏՅԱՆ
