Այսօր լրագրողները ԱԺ ճեպազրույցի ժամանակ «դիտողություն» արեցին ՕԵԿ-ին, այնքան ակտիվ է, անընդհատ ՕԵԿ պատգամավորները ելույթ են ունենում, հարց են տալիս: Հումորային դիտարկմանը, որ «քիչըմ տեղ տվեք ՀՀԿ-ականներին»՝ ՕԵԿ պատգամավոր Հովհաննես Մարգարյանը պատասխանեց. «Ըմբռնումով եմ մոտենում ձեր ասածին: ՕԵԿ-ը միշտ է ամենաակտիվ խմբակցությունը եղել: 2012-13-ին ամենաակտիվ խմբակցությունն է ճանաչվել խորհրդարանում»:
Հարցին՝ եթե ուղիղ հեռարձակում չլիներ, ՕԵԿ-ն էլի այդքան ակտիվ կլինե՞ր՝ Հովհաննես Մարգարյանը պատասխանեց, որ ուղիղ հեռարձակումը ողջունելի է:
Հովհաննես Մարգարյանը ԱԺ էթիկայի հանձնաժողովի անդամ է, ուստի Aravot.am-ը նրանից հետաքրքրվեց՝ այն, որ ՀՀԿ պատգամավոր Սեյրան Սարոյանը հրապարակավ «Ժառանգության» պատգմավոր Զարուհի Փոստանջյանին վիրավորում է, ասում է՝ «Նարկամանը քո մարդն ա, քո երեխեքն են», այդ պահվածքը կարո՞ղ է դառնալ ԱԺ էթիկայի հանձնաժողովի քննարկման առարկա եւ հնարավո՞ր է գեներալը պատժվի՝ իր այդ հակապառլամենտական պահվածքի համար:
Նա պատասխանեց. «Իհարկե, կարող է, եթե դիմում լինի»:
Կարդացեք նաև
Մեր հարցին՝ ինչքանո՞վ է արդյունավետ այդ հանձնաժողովի աշխատանքը, որովհետեւ պատգամավորներն այդ հանձնաժողովի հետ հույս չեն կապում՝ նա պատասխանեց. «Եղել են դեպքեր, երբ խախտում եղել է, բայց որևէ իրավական հետեւանք չկա: Իմ պատկերացումներով՝ պետք է իրավական հետեւանքներ լինեն: Միայն իրավական հետեւանք կա այն դեպքերի համար, երբ պատգամավորը զբաղվում է նաեւ ձեռնարկատիրական գործունեությամբ: Այդ դեպքում զրկում են մանդատից: Մնացած դեպքերում չկա իրավական հետեւանք»:
Հարցին՝ վարչապետն ասաց, որ «Նաիրիտի» պարտքերի մարումը մինչեւ տարեվերջ տեղի կունենա՝ հավատո՞ւմ եք՝ նա պատասխանեց, որ շուտով ականատես կլինեն. «Կարծում եմ, վարչապետը նույնպես մտահոգ է: Հունիսը սարերի ետեւում չէ»:
Հռիփսիմե ՋԵԲԵՋՅԱՆ
