Մաշտոցի պուրակում այսօր մի խումբ քաղաքացիներ քննարկել են էլեկտրաէներգիայի սակագնի թանկացման հարցը ու իրենց առաջարկները ներկայացրել թանկացումը կանխելու վերաբերյալ:
Օրինակ` թանկացման դեմ պայքարի ձեւերից մեկն այսօր քննարկվում էր մայիսի 25-ին մի քանի ժամով հոսանքի անջատումները, այսինքն` քաղաքացիներին առաջարկվելու է այդ օրը բոյկոտել հոսանքն ու չօգտագործել՝ երեկոյան 21:00-23:00-ը:
![IMG_4882[1]](https://www.aravot.am/wp-content/uploads/2015/05/IMG_48821.gif)
![IMG_4875[1]](https://www.aravot.am/wp-content/uploads/2015/05/IMG_48751.gif)
Մայիսի 27-ին էլ երթեր են նախատեսված ամբողջ հանրապետությունում:
Կարդացեք նաև
Հասարակական պաշտպանների միության գործադիր տնօրեն Արամ Գրիգորյանը Aravot.am-ին ասաց, որ բացարձակ հիմնավորված չեն թանկացման պատճառաբանությունները. «Դեռ չկա որեւէ հաշվարկ ու փորձագիտական մոտեցում կարելի է ասել, որ որեւէ բան հիմնավորված չէ: Հայաստանում էներգետիկայի քաղաքականություն, ռազմավարություն գոյություն չունի ու ամեն անգամ ժողովրդին կանգնեցնելու է այսպիսի խնդրի առջեւ: Չկա նաեւ սակագների սահմանման քաղաքականություն, ցանկացած սպառող ինքը պետք է իմանա թե ապագայում սակագների չափերում ինչպիսի փոփոխություններ պետք է լինեն»:
Անդրադառնալով էլեկտրաէներգիայի սակագնի թանկացման հիմնական հիմնավորմանը՝ ՀԷՑ-ի գոյացած պարտքերին, փորձագետն ասաց. «ՀԷՑ-ն աշխատում է շատ անարդյունավետ: Եթե ՀԷՑ-ի ղեկավարությունը ստացել է 30.-50.000 դոլար ամսական աշխատավարձ, որի արդյունքում կուտակվել է 250 միլիոն դոլար պարտք, դա չի նշանակում, որ Հայաստանի սպառողը դրա համար պետք է վճարի: Սա նշանակում է, որ քաղաքականությունը չկա, նշանակում է՝ մեր պետության վերահսկողությունը չկա»:
Նրա խոսքով թանկացման խնդիրը քաղաքական է. «Մենք ընկել ենք ուրիշ երկրի քաղաքականության ազդեցության մեջ: Մեր գաղութի օրենքներով շարժվող պետություն ունենք եւ քաղաքականությունն այդպես է վարվում, երբ ՀԷՑ-ի ղեկավարությունը՝ Ռուսաստանը, մեզ պարտադրում է վճարել, ինձ էսքան փող է պետք, տվեք»:
Մասնակիցները քննարկման ժամանակ այսօր առաջարկեցին բուռն պայքար՝ տրանսպորտի սակագնի թանկացման դեմ պայքարի նման լայնամասշտաբ պայքար:
Արփինե ՍԻՄՈՆՅԱՆ
