Պաշտոնավարման մեկ տարվա ընթացքում կատարած աշխատանքներն ամփոփելու նպատակով այսօր հրավիրված մամուլի ասուլիսում ՀՀ սպորտի եւ երիտասարդության հարցերի նախարար Գաբրիել Ղազարյանը նշեց, որ սպորտի պետական կառույցը մշակում եւ իրականացնում է այս ոլորտում հանրապետությունում իրականացվող ընդհանուր քաղաքականությունը:
Նախարարն այդ ճանապարհին կարեւորեց պատշաճ նյութատեխնիկական բազայի՝ նախադպրոցական եւ հանրակրթական դպրոցներում մարզադահլիճներ, մարզակառույցներ, մարզագույք եւ այլն, առկայությունը: «Եթե ուզում ենք մեծ սպորտում ավելի բարձր նվաճումների հասնել, պետք է ունենանք ֆիզիկական կուլտուրայի ավելի մեծ մասսայականություն: Իսկ մասսայականության համար համապատասխան պայմաններ են անհրաժեշտ, ինչ ուղղությամբ աշխատում ենք», – ասաց Գաբրիել Ղազարյանը:
Aravot.am-ի հարցին, թե պակաս կարեւոր չեն նաեւ մարզիչ-մանկավարժների, ֆիզկուլտուրայի ուսուցիչների մասնագիտական որակները եւ պատասխանատվության զգացումը եւ դրա հետ կապված կադրային ի՞նչ քաղաքականություն է իրականացվում, նախարարը պատասխանեց. «Հարցը տեղին է: Մասնագետներ կան, որ համեմատաբար բարվոք պայմաններում աշխատելով ակնկալվող արդյունք չեն տալիս: Եվ հակառակը. կան մարզիչներ, որոնք ավելի անբարենպաստ պայմաններում կադրեր են աճեցնում, որոնք հետագայում համալրում են տարբեր տարիքային խմբերի մեր հավաքական թիմերը: Ընդհանուր առմամբ, մեր մասնագետները վատը չեն: Բայց եթե լինում են այնպիսիք, որոնք չեն արդարացնում իրենց, պարտավոր են իրենց տեղը զիջել»:
Աշոտ ՀԱԿՈԲՅԱՆ
