«Մենք չենք պատրաստում նախատեսում քննարկումների կամ անիմաստ երկխոսությունների մեջ մտնել»,- մայիսի 20-ին «Հայացք» մամուլի ակումբում լրագրողների հետ հանդիպման ընթացքում հայտարարեց «Ոչ թալանին» քաղաքացիական նախաձեռնության համակարգող խմբի անդամ Գեւորգ Սանոյանը:
Նա ասաց, որ նախաձեռնությունը պահանջում է, որ էլեկտրաէներգիան ոչ մի լումայով չթանկանա. «Մեր պահանջներն ուղղված են իշխանություններին, մասնավորապես՝ կառավարությանը, վարչապետին եւ էներգետիկայի նախարարին, որպեսզի նրանք քայլեր ձեռնարկեն այդ թանկացումները կանխելու համար»:
Նա հավելեց, որ իրավագիտակից քաղաքացիներն են այս երկրի տերը եւ չեն պատրաստվում հպատակի տեսք ընդունել. «Մենք ուզում ենք հիշեցնել, որ մենք չպետք է զբաղվենք խնդիրների լուծումներ գտնելով, այլ մենք, լինելով հարկատուներ, այս երկրի տերը, պահանջում ենք այս իշխանություններից, որպեսզի նրանք սպասարկեն ազգաբնակչության եւ երկրի շահերը, այլ ոչ թե ինչ-որ խմբերի»:
Կարդացեք նաև
Գեւորգ Սանոյանի խոսքերով՝ «Ոչ թալանին» քաղաքացիական նախաձեռնությունը օգտվելու է Սահմանադրությամբ իրեն ընձեռած բոլոր հնարավորություններից. «Եթե այս պահի դրությամբ իշխանությունները որեւէ լուծում չունեն, դա դեռ չի նշանակում, որ խնդիրը լուծում չունի եւ դա հնարավոր չէ իրականացնել: Քաղաքացիները չպետք է զբաղվեն լուծումներ որոնելով. Քաղաքացիները պահանջում են իրենց իսկ կողմից վճարվող հարկերով ֆինանսավորվող եւ աշխատող կառավարությունից, որպեսզի նա հստակ կատարի իր առջեւ դրված խնդիրները եւ սպասարկի ժողովրդին»:
Ամի ՉԻՉԱԿՅԱՆ
