Հունիսի 7-ին Արտաշատում տեղի կունենան քաղաքապետի ընտրություններ: Ըստ ԿԸՀ կայքի` կա երկու թեկնածություն` Արգամ Աբրահամյանը` ՀՀ վարչապետ Հովիկ Աբրահամյանի որդին («Հայկական ժամանակի» լուսանկարում) և «Հայռուսգազարդի» Արարատի մասնաճյուղի նախկին տնօրեն Հովհաննես Ղազարյանը (Գազի Հովո): Նշենք, որ այդ երկու թեկնածուների գերդաստանները, մեղմ ասած, հակասություններ ունեին, մինչև անգամ հաշիվներ մաքրելու գործընթացը հասել էր տաքսի սերվիս այրելուն ու կրակոցներին: Ուստի մրցում են, կարելի է ասել, վաղեմի հակառակորդները:
Հիշեցնենք, որ Արտաշատի քաղաքապետի թեկնածու առաջադրվել էր ՀՀ ԱԺ պատգամավոր, նախկին ԲՀԿ-ական Կարո Կարապետյանի՝ Յուվեցի Կարոյի հորաքրոջ որդին` Գարեգին Համբարձումյանը: Սակայն նա երկու օր առաջ հանել է իր թեկնածությունը:
Խոսակցություններ կան այն մասին, Հովհաննես Ղազարյանը ևս առաջիկայում կհանի իր թեկնածությունը:
Aravot.am-ը նրանից հետաքրքրվեց` նման մտադրություններ ունի՞: Հովհաննես Ղազարյանը պատասխանեց. «Առայժմ շարունակում եմ պայքարել, չէ՞, երևի, ինֆորմացիա՞ ունեք, որ հակառա՞կն է»: Մեր այն արձագանքին, թե դրա համար էլ փորձում ենք անձամբ իրենից պարզաբանում ստանալ իր մտադրությունների մասին, պարոն Ղազարյանը պատասխանեց. «Եթե հետ վերցնելու լինեմ, հետ կվերցնեմ: Ես դա ոչ մեկից չեմ հարցնի. ես եմ որոշում: Օրերը կգան, քանի կմոտենան ընտրությունները, տեսնենք, ոնց կլինի»:
Կարդացեք նաև
Մեր մյուս հարցին` իսկ ի՞նչը կարող է պատճառ դառնալ թեկնածությունը հանելու` հաշվի առնելով մյուս թեկնածուի` վարչապետի որդու հետ ունեցած հակամարտությունները, Հովհաննես Ղազարյանն արձագանքեց. «Ամեն ինչ հնարավոր է: Ես ինչ ասեմ Ձեզ, ես միտք չունեմ իմ թեկնածությունը հանելու, Դուք անընդհատ դրա վրա եք աշխատում: Ես ինձ համար որոշված գնում եմ առաջ»:
Դիտարկմանը` մրցակցությունը բա՞րդ է լինելու, քանի որ հակառակ կողմում վարչապետի որդին է, Հովհաննես Ղազարյանը պատասխանեց. «Ես արտաշատցի եմ. չգիտեմ` բարդ է, թե թեթև կտեսնենք, ժամանակը ցույց կտա»:
Նշենք, որ իր թեկնածություն առաջադրելու մտադրություններ ուներ նաև Արտաշատի գործող քաղաքապետ ՀՀԿ անդամ Գագիկ Մուրադյանը: Սակայն նա այդպես էլ չառաջադրվեց:
Տաթև ՀԱՐՈՒԹՅՈՒՆՅԱՆ
