Այսօր ԱԺ նիստում քվեարկության դրվեց եւ 100 կողմ, 1 դեմ, 10 ձեռնպահ ձայների հարաբերակցությամբ առաջին ընթերցմամբ ընդունվեց՝ երեկ քննարկված «Հանրաքվեի մասին» օրենքում փոփոխություն եւ լրացում կատարելու մասին նախագիծը:
ԲՀԿ ղեկավար Նաիրա Զոհրաբյանն ասաց, որ ԲՀԿ-ն կողմ է քվեարկելու առաջարկին, որովհետեւ այն էականորեն բարելավում է առաջարկվող ինստիտուտը: Սակայն ընդդիմադիր գործընկերների հետ ԲՀԿ-ն եւս կներկայացնի առաջարկ:
Իսկ ՕԵԿ պատգամավոր Հովհաննես Մարգարյանն ասաց, որ ՕԵԿ-ը որոշել է ձեռնպահ քվեարկել, մինչեւ երկրորդ ընթերցման ժամանակ իրենց առաջարկներն ընդունվեն:
ՀԱԿ խմբակցության ղեկավար Լեւոն Զուրաբյանի խոսքերով՝ «Մենք շատ լավ հասկանում ենք, թե ինչի համար է այս օրենքի նախագիծը ներկայացված ԱԺ: Մենք ընդունում ենք այդ մարտահրավերը: Մենք պատրաստ ենք գնալ հանրաքվեի մեր օրակարգով՝ մերժելով այդ փորձը՝ երկարաձգելու ինչ-որ մեկի իշխանությունը»:
Կարդացեք նաև
Հանրաքվեի մասին օրենքի հետ կապված նա ասաց, որ լուրջ առաջարկներ կներկայացնեն, իսկ առայժմ ձեռնպահ կքվեարկեն, մինչեւ տեսնեն, թե իրենց առաջարկներն ինչքանով կընդունվեն:
Արծվիկ Մինասյանը, որը օրենքի համահեղինակներից է, ասաց, որ պատրաստ են քննարկել եւ նախագիծը լրամշակել:
Հռիփսիմե ՋԵԲԵՋՅԱՆ
