Մայիսի 19-ին «Հայ Արտ» մշակութային կենտրոնի, «Վարդգես Խախամյան Բուզանդ» ԱՁ-ի նախաձեռնությամբ և ՀՀ սփյուռքի նախարարության աջակցությամբ «Հայարտ» մշակութային կենտրոնում մեկնարկեց «Արտ էքսպո» ցուցահանդեսը, որը Հայաստանում կազմակերպվում է առաջին անգամ:
Ցուցահանդեսին բացման խոսքով հանդես եկավ ՀՀ սփյուռքի նախարար Հրանուշ Հակոբյանը: Ողջունելով ներկաներին՝ նախարարը, մասնավորապես, նշեց.«Այսօր բոլորս ականատեսն ու մասնակիցն ենք նախադեպը չունեցող մշակութային միջոցառման: Ներկայացված հայ և օտար շուրջ 50 նկարիչների աշխատանքները արվեստասեր հասարակությանը բազմալեզու մշակութային երկխոսության հնարավորություն են ընձեռում: Այսօր Հայրենիք-Սփյուռք` իր տեսակի մեջ եզակի մշակութային գործակցության ծրագրի հիմքն ենք դնում, որը, կարծում եմ, շարունակական կլինի և, Սփյուռքի մեր հայրենակիցներին Հայրենիքում իրենց կտավները ցուցադրելու, հայրենյաց և օտար նկարիչների, արվեսագետների և արվեսասերների հետ հաղորդակցվելու, Հայրենիքից ոգի առնելու և ստեղծագործական նոր հաջողություններ ունենալու հնարավորություն է ընձեռում»:
Նախարարը արժևորեց հատկապես «Արտ Էքսպոյի» իրականացման հեղինակներ, կազմակերպիչներ Ռիտա Շառոյանի և Վարդգես Խախամյանի ավանդը, ովքեր իրենց գործունեությամբ նպաստում են հայ մշակույթի տարածմանն ու զարգացմանը:
Ցուցահանդեսին ներկայացվեցին Ռաֆֆի Յուրեջյանի, Ալեքս Թավերդիի (Անգլիա), Արփա Հակոբյանի, Շաքե Ամիրյան (Իրան), Ադրինե Գրեգորյանի (ԱՄՆ), Վարդգես Խախամյանի (Լիբանան), Նաիրա Չիլինգարյանի (Գերմանիա), ինչպես նաև այլ նկարիչների ավելի քան 130 աշխատանքներ:
Ողջույնի խոսքով հանդես եկավ նաև «Հայարտ» մշակութային կենտրոնի տնօրեն Ռիտա Շառոյանը՝ մասնավորապես նշելով.« Ուրախ եմ, որ մեր հարկի տակ այսպիսի բացառիկ ցուցահանդես է բացվում, որտեղ միավորվել են Սփյուռքում և Հայաստանում ապրող բազմաթիվ նկարիչներ: Այս ցուցահանդեսը փորձի փոխանակման և միմյանց հետ ծանոթանալու լավագույն միջոց է»:
Ելույթի խոսքով հանդես եկան նաև Վարդգես Խախամյանը և ցուցահանդեսի մասնակից մի շարք նկարիչներ:
Միջոցառմանը երաժշտական համարներ ներկայացրեցին Տաթև Սասունյանը և Դավիթ Գեղամյանը:
Ցուցահանդեսը կշարունակվի մինչև մայիսի 29-ը:
ՀՀ սփյուռքի նախարարություն
