Գրող, մի շարք մրցանակների դափնեկիր, «Ազատ մամուլ» կայքի գլխավոր խմբագիր Զախար Պրիլեպինը Հայաստանում է:
Մայիսի 19-ին «Սպուտնիկ Արմենիա» մամուլի ակումբում նա հանդիպեց լրագրողների հետ:
«Հայաստանը իմ կյանքում այդքան էլ շուտ չի հայտնվել: Ես ժամանակ առ ժամանակ Դոնբաս եմ գնում մարդասիրական առաքելությամբ, եւ վերջին ուղեւորության ժամանակ ես ծանոթացա եւ աշխատում եմ Սիմոն Վարդանյան անունով մարդու հետ, որն այնտեղ զբաղվում է գերիների փոխանակմամբ: Այսպիսով՝ ես կամաց-կամաց մուտք եմ գործում հայկական համայնք»,- ասաց գրողը:
Անդրադառնալով Ռուսաստանի վրա կիրառվող ճնշումներին՝ Զախար Պրիլեպինն ասաց, որ դա սովորական երեւույթ է, եւ աշխարհում ժամանակ առ ժամանակ այն տեղի է ունենում. «Վերջին 9 ամիսների ընթացքում 6 անգամ Դոնբասում եմ եղել, իրավիճակը բավականին լավ գիտեմ: Մի բան կարող եմ ասել՝ նույնիսկ Ռուսաստանի մռայլ եւ դաժան մասնակցության դեպքում այս իրավիճակում Վլադիմիր Պուտինից ավելի խաղաղարար անձնավորություն չկա: Ռազմական գործողությունները ուկրաինական կողմն է նախաձեռնում»:
Կարդացեք նաև
Նրա կանխատեսմամբ՝ եթե իրավիճակը կրկին սրվի, ապա Ուկրաինան այս անգամ կկորցնի Մարիուպոլ քաղաքը. «Կիեւի իշխանությունները պարադոքսալ իրավիճակում են գտնվում. Մի կողմից նրանք պետք է նվաճեն այդ տարածքները, մյուս կողմից հասկանում են, որ յուրաքանչյուր անգամ, երբ սկսում են կռվել, պարտվում են: Այդ պատճառով՝ ես կռահում եմ, որ Մոսկվան արգելում է կոնֆլիկտի յուրաքանչյուր սրացում»:
Ամի ՉԻՉԱԿՅԱՆ
