Այսօր՝ մայիսի 19-ին, «Տեսակետ» ակումբում հյուրընկալվել էին Հայկական ճարտարապետությունն ուսումնասիրող հիմնադրամի նախագահ Սամվել Կարապետյանը եւ ճարտարապետ Սամվել Այվազյանը: Նրանք խոսեցին «Հայկական ճարտարապետությունն ուսումնասիրող հիմնադրամի գիտական ուսումնասիրություններ» գրքաշարի նորատիպ 17-րդ հատորից, որ կրում է «Դադիվանքի վերականգնումը 1997-2011 թթ.» վերնագիրը: Սամվել Կարապետյանը նշեց, որ նման գիրք ունենալը լուսահոգի Արմեն Հախնազարյանի գաղափարն էր:
Սամվել Կարապետյանի խոսքով, երկու տասնյակից ավելի շինություններ կան Դադիվանքում, ընդ որում մեծ մասը պաշտամունքային է: Փորձել են համալիրը վերականգնել, բայց դեռ էլի անելիքներ կան: «Մեր սերունդն ազատագրեց Քարվաճառը, եւ մեր պարտքն էր վերականգնել Դադիվանքը ու ներկայացնել նոր սերունդներին»,-համոզված է Սամվել Կարապետյանը
Սամվել Այվազյանն էլ փաստեց, թե համալիրը ոչ բարվոք վիճակում է, նաեւ կարեւորեց Արմեն Հախնազարյանի կատարած աշխատանքը ֆինանսներ գտնելու ու վտանգված հուշարձանները վերականգնելու հարցում: Նա կարեւորեց գիտական վերականգնման սկզբունքը:
Խոսելով նոր եկեղեցիներ կառուցելու մասին, Այվազյանն ասաց, թե մարդկանց հավատքի տաճարներ էլ են պետք, բայց պետք է այնպես անել, որ եղածը պահպանեն, հետո նոր միայն դրա վրա ավելացնեն:
Կարդացեք նաև
Աննա ՍՈՒՐԵՆՅԱՆ
