Վաչե Տերտերյանը չբացառեց, որ Սյունիքում հանրաքվեի դրական ձայները պայմանավորված են Սուրիկ Խաչատրյանի անձով:
«Ոչ մի տեղ ընտրությունները չեն տապալվել»,- խորհրդարանում լրագրողների հետ զրույցում ասաց Տարածքային կառավարման փոխնախարար Վաչե Տերտերյանը, պատասխանելով լրագրողներից մեկի դիտարկմանը, որ համայնքների խոշորացման հանրաքվեն Տավուշում տապալվեց, քանի որ մեծ մասը դեմ էին քվեարկել: «Ոչ մի տեղ մեծամասամբ «ոչ» չեն ասել, և եթե դուք հարցը տալիս եք Տավուշի մարզի մասին, ասեմ, որ երեք համայնքում է, որ ավելի քիչ ձայն է ստացել հանրաքվեն, բայց ընդհանուր առմամբ և ճնշող մեծամասնությամբ բոլոր մարզերում ստացել է «այո»,-շարունակեց Վաչե Տերտերյանը:
Համայնքների խոշորացման առիթով անցած կիրակի օրն անցկացված հանրաքվեի մասնակցությունը փոխնախարարը գնահատեց բավարար: Հիշեցնենք, որ փորձնական ծրագիրն իրականացվում է Տավուշում, Լոռիում եւ Սյունիքում:
«Նորմալ էր: Մասնակցության չափը երեսուն տոկոսից տատանվում է մինչև վաթսուն տոկոս: Եթե դուք նկատի ունեք, որ քիչ է, ես էլ գտնում եմ, որ շատ նորմալ է: Համեմատած նախորդ ընտրությունների հետ, գուցե պատճառը կարող է լինել այն, որ անձնավորված ընտրություն չի եղել, այսինքն, չեն եղել պայքարող թիմեր, չկան ավագանու անդամներ և չկան շատ շահագրգռված ուղիղ մասնակիցներ»,-շարունակեց Վաչե Տերտերյանը: Նա չի կիսում տեսակետը, որ հանրաքվեի նկատմամբ հետաքրքրություն չի եղել:
Կարդացեք նաև
Փոխնախարարը նաեւ տարօրինակ չհամարեց այն փաստը, որ Սյունիքի մարզում 94% «կողմ» են քվեարկել համայնքների խոշորացմանը. «Այցելությունների ժամանակ և «դեմ» էին և «կողմ» էին արտահայտվում»: Փոխնախարարն ասաց, որ բնակիչների հետ հանդիպմանը ներկա էր լինում նաև Սյունիքի մարզպետ Սուրիկ Խաչատրյանը:
Լրագրողները հետաքրքրվեցին` այդքան դրական ձայների քանակը չի՞ պայմանավորում Սուրիկ Խաչատրյանի անձով, Վաչե Տերտերյանն ասաց. «Իսկ ինչպես ես կարող եմ իր անձով չպայմանավորել, իհարկե պայմանավորում եմ, լավ իմաստով պայմանավորում եմ նաև իր անձով, իմ անձով, փորձագետների, գյուղապետերի անձով»:
Նա չհամաձայնեց լրագրողի այն դիտարկմանը, թե վախը և ահաբեկումները ևս կարող էին պատճառ հանդիսանալ, որ սյունեցիները «կողմ» լինեին հանրաքվեին:
Նելլի ԳՐԻԳՈՐՅԱՆ
