Այսօր ԱԺ նիստում ԲՀԿ ղեկավար Նաիրա Զոհրաբյանը ԱԺ նախագահ Գալուստ Սահակյանին առաջարկեց, որ էլեկտրաէներգիայի սակագնի թեմայով խորհրդարանական լսումներ կազմակերպեն. «Սոցիալական այս պայմաններում նման քայլի գնալն անթույլատրելի է»:
Նա տեղեկացրեց, որ 4 խմբակցություններ աշխատանքային քննարկում են անցկացրել եւ անդրադարձել այդ խնդրին: Նաիրա Զոհրաբյանն առաջարկեց խորհրդարանական լսումներին հրավիրել Հանրային ծառայությունները կարգավորող հանձնաժողովի Ռոբերտ Նազարյանի, էներգետիկայի եւ բնական պաշարների նախարարին եւ հայտ ներկայացնող այն կազմակերպություններին, որոնք ըստ իրենց տեղեկությունների` շարունակում են աշխատել վնասով, բայց մազոխիստաբար շարունակում են աշխատել այդ ընկերությունների հետ. «Թեկուզ 1 լումայի թանկացումը կարող է ունենալ կործանարար հետեւանքներ»:
Նա առաջարկեց լայն ձեւաչափով քննարկման ժամանակ փորձել հասկանալ, թե ինչ հաշվարկների հիման վրա են պնդում, որ էլեկտրաէներգիայի սակագնի բարձրացումն անխուսափելի է:
Գալուստ Սահակյանն ասաց, որ ՀԾԿՀ-ն նյութերը, հայտը նոր է ստացել, երբ պատրաստ կլինի, լսումներ կանցկացվեն ԱԺ-ում:
Կարդացեք նաև
ՀԱԿ խմբակցության պատգամավոր Նիկոլ Փաշինյանն էլ ասաց, որ էլեկտրաէներգիայի սակագնի հետ կապված խնդրին ԱԺ-ն ոչ թե պետք է պոստ ֆակտում արձագանքի, այլ պետք է նախապես այդ հարցի վերաբերյալ քննարկումներ անցկացնեն. «Կան բազմաթիվ հարցեր, ամենակարեւոր հարցը հետեւյալն է. ինչպես է ՀԷՑ-ը 300 մլն դոլարի պարտք կուտակել: Դուք ասում եք, որ հանձնաժողովը նոր է ստացել հայտը, բայց նախնական ուսումնասիրությունից պարզում ենք, որ Բաշխիչ ցանցերի ղեկավարության կարծիքով սպառողները պետք է վճարեն նաեւ աստղաբաշխական թվերով իրենց վարձակալած «Լեքսուսների, «Մերսեդեսների» համար: ԱԺ-ն չպետք է սպասողական դիրքորոշում որդեգրի:Այն մարդիկ՝ ընտրողները, որոնք ձեւավորել են այսօրվա ԱԺ-ն, ուղիղ պահանջ ունեն, որ մենք բարձրացնենք այդ հարցերը եւ փորձենք հասկանալ, թե ինչի հիման վրա է ՀԷՑ-ը բարձրացնում սակագինը»:
Գալուստ Սահակյանը պատասխանեց. «Չեմ կարծում, որ այս հարցի համար պիտի բանակների բաժանվենք, ասենք՝ այո կամ ոչ: Եթե էլեկտրաէներգիայի սակագինը բարձրանում է, դա բոլորի հոգսն է: Ինչ վերաբերում է այսօրվանից քննարկելու համար, մենք որեւէ նյութ չունենք դրա համար: Դա ներկայացվել է համապատասխան լիազոր մարմնին: Երբ պատրաստ կլինի, ուսումնասիրություններ կունենան այս 2 օրը, կհրավիրենք լսումների: Դուք խոսում եք «Լեքսուսների» կամ այլ չարաշահումների մասին: Եթե այդ նյութերն ունեք, միանգամից համապատասխան մարմնի կարող եք տեղեկացնել, որ այդ հարցը քննարկվի: Իսկ եթե ցանկանում ենք համոզվել, թե ինչպիսի վերլուծություններ կան, պիտի սպասենք, մինչեւ լիազոր մարմինը ներկայացնի ձեր բոլորին»:
Հռիփսիմե ՋԵԲԵՋՅԱՆ
