Փաստաբան Լիանա Բալյանի դիտարկմամբ՝ ամուսնալուծությունների թիվը Հայաստանում տարեցտարի աճում է, որովհետև ՀՀ օրենսդրությամբ ամուսնալուծվելու ընթացակարգն այնքան հեշտացված է, որ ամուսիններն առանց որևէ դժվարության ամուսնալուծվում են:
Մեր երկրում ամուսնալուծությունների հիմնական պատճառը, ըստ փաստաբանի, արտագնա աշխատանքն է:
Այսօր՝ Ընտանիքի միջազգային օրվա առթիվ հրավիրված մամուլի ասուլիսի ժամանակ, Լ. Բալյանը համոզմունք հայտնեց, որ եթե ընտանեկան օրենսգրքում լուրջ փոփոխություններ կատարվեն, և բարդացվի ամուսնալուծությունների ընթացակարգը, ապա դրանց թիվը զգալիորեն կնվազի. «Հայաստանում այնքան հեշտ է ամուսնալուծվելը: Ամուսիններից միայն մեկի ցանկությունն էլ է բավական դրա համար»,- ասաց նա՝ մտահոգություն հայտնելով, որ թեև դատարանն իրավունք ունի միջոցներ ձեռնարկելու ամուսիններին հաշտեցնելու ուղղությամբ, բայց միայն 3 ամիս ժամանակ է տալիս նրանց, որ նրանք իրենք հաշտվեն. «Իսկ ինքը որևէ աշխատանք չի տանում հաշտեցնելու ուղղությամբ. ոչ դատավորն է հոգեբան, ոչ էլ փաստաբանը»:
Լ. Բալյանը համոզված է, որ ամուսնալուծությունների գործում պետք է ներգրավել հոգեբանի, որը կողմերի հետ համապատասխան աշխատանք կտանի: Փաստաբանը վստահ է, որ հոգեբանի ներգրավմամբ հնարավոր կլինի խուսափել շատ ամուսնալուծություններից:
Կարդացեք նաև
Իսկ ինչո՞ւ են շատացել ամուսնալուծությունները:
«Խորհրդային տարիներին ձևավորված ընտանիքները ջանում էին ամուր պահել ընտանիքը, որովհետև ամուսնալուծվելիս անպայման քննադատվում էին նաև շրջապատի կողմից: Դա ամոթ էր համարվում այն ժամանակ, իսկ հիմա շատացել է ազատությունը, և ամոթ չի համարվում, ավելին՝ երբեմն նաև խրախուսվում է: Բացի այդ, շատացել են «գործնական» կանայք, որոնք աշխատանք ունեն և մտածում են, թե ինչու պետք է ամուսնու ծեծը տանեն կամ ենթարկվեն սկեսրոջ քմահաճույքներին:
Ահա այդ ազատությունը, ամուսնալուծվելու հեշտացված ընթացակարգը (այն առաջ ավելի դժվար է եղել), սերիալները և եվրոպական մի շարք «արժեքների» ներթափանցումը մեր երկիր ինքնըստինքյան բերեցին ընտանիքների քայքայման»,- ասաց փաստաբանը:
Սիրանուշ ՀԱՅՐԱՊԵՏՅԱՆ
