ՀՖՖ մամուլի քարտուղարությունը տեղեկատվություն էր տարածել, որ երեկ կայացած ֆեդերացիայի կարգապահական կոմիտեի հերթական նիստում քննարկվել է Հայաստանի բարձրագույն խմբի առաջնության 25-րդ տուրի «Ալաշկերտ»-«Գանձասար Կապան» (1:0) հանդիպումից հետո տեղի ունեցած միջադեպը եւ որոշվել անվայել վարքագծի համար «Ալաշկերտ» ՖԱ նախագահ Բագրատ Նավոյանին (Բագրատ Նավոյանը ՀՖՖ գործկոմի անդամ է) հայտարարել խիստ նկատողություն եւ ակումբին տուգանել 50 հազար դրամ: Նույն պատճառով «Գանձասար Կապան» թիմի մարզիչ-խորհրդատու Սամվել Պետրոսյանին եւս հայտարարվել է խիստ նկատողություն: Նա նաեւ որակազրկվել է երկու խաղով, իսկ ակումբը տուգանվել 50 հազար դրամ:
Aravot.am-ը փորձեց ակումբներից մեկնաբանություն ստանալ տեղի ունեցածի մասին: «Գանձասար Կապանի» գլխավոր մենեջեր Վահան Դանիելյանն ասաց. «Խաղից հետո միջադեպ է եղել, որի համար ֆեդերացիան կայացրել է որոշում եւ մենք պարտավոր ենք ենթարկվել: Մենք մեկնաբանություն չունենք»: «Ալաշկերտ» ակումբի մամուլի քարտուղար Գեւորգ Մարիկյանի խոսքերով էլ ինքն անձամբ միջադեպի ականատեսը չի եղել: «Ես հաղորդավարականում եմ եղել: Մինչեւ սարքավորումներն անջատեցի եւ իջա, միջադեպն ավարտվել էր: Եթե ես իմ աքով չեմ տեսել, ի՞նչը մեկնաբանեմ», – ասաց Գեւորգ Մարիկյանը:
Աշոտ ՀԱԿՈԲՅԱՆ
