Երևանի քաղաքապետարանը, Ընտանիքի միջազգային օրվա՝ մայիսի 15-ի առթիվ իրականացվող բազմաթիվ միջոցառումներին ի հավելումն, ներկայացրել է «Իմ ընտանիքը իմ հարստությունն է» խորագրով սոցիալական նախագիծ: Մասնակցել են Երևան քաղաքի տարբեր վարչական շրջաններում ապրող տարբեր մասնագիտության տեր, ակտիվ հասարակական կյանքով ապրող, բազմազավակ ու պարզապես համերաշխ և աշխատասեր երևանաբնակ ընտանիքներ՝ իրենց մեծ գերդաստաններով:
Երևանի տարբեր հատվածներում տեղադրված վահանակներին մայիսի 15-ից ներկայացվել են նախագծում ներգրավված տարբեր ընտանիքների լուսանկարները, իսկ «Ֆեյսբուք» սոցիալական ցանցի Երևանի քաղաքապետարանի էջում կհրապարակվեն նախագծի մասնակիցների հետ հարցազրույցները՝ ընտանեկան երջանկության ու քաղաքային մշակույթի ձևավորման հարցում ընտանիքների դերի կարևորության մասին:
Նախագծի հաջորդ փուլում նախատեսվում է ամբողջացնել երևանաբնակ ընտանիքների ալբոմը և ներկայացնել բազմաթիվ այլ ընտանիքների, որոնք իրենց ամենօրյա աշխատանքով ու նվիրումով Երևան քաղաքին փոխանցում են այն ուղերձը, որ երջանիկ ու ամուր ընտանիքն ամենակարևոր արժեքն է, որով իրապես հարուստ է դառնում նաև քաղաքամայր Երևանը:
Նշենք, որ Երևանի քաղաքապետարանը շարունակելու է սոցիալական նշանակության իր բոլոր ծրագրերում առանձնակի ուշադրություն դարձնել ընտանեկան արժեքների պահպանմանն ուղղված միջոցառումներին՝ քաղաքային տնտեսության զարգացման մյուս ծրագրերում ևս շեշտադրելով ավելի հարմարավետ քաղաք ունենալու առաջնահերթությունը:
Կարդացեք նաև
Երևանի քաղաքապետարանի մամուլի հաղորդագրություն
