Գերմանաբնակ ճանաչված կիթառահար Ժորա Սարգսյանը համոզված է, որ եթե որոշ երկրներ հարուստ են գազով, նավթով եւ այլ ռեսուրսներով, ապա հայերը` մշակույթով: Երաժշտի ձեւակերպմամբ՝ այդ հարստությունը նման է մշակման կարոտ ադամանդի:
«Մշակված որոշ ադամանդներ արդեն ունենք (նկատի ունի աշխարհին հայտնի հայ արվեստագետներին), բայց դրանք հայտնի են դարձել միայն արտերկրում կատարելագործվելուց հետո: Այսինքն՝ ստացվում է, որ, այնուամենայնիվ, ինչ-որ տեղ թերացել ենք: Օրինակ՝ մինչ օրս Հայաստանում մշակույթի տարբեր ոլորտներում չեն գործում ամառային դպրոցներ: Բարձրակարգ ուսումնական ընթացք ապահովելը, պարզվում է, բավարար չէ: Ավելին՝ ամռանը մեռնում է հայաստանյան մշակութային կյանքը՝ արձակուրդում են թատրոնները, համերգասրահները… Եվ սա այն դեպքում, երբ հենց այդ ժամանակ է մեծանում զբոսաշրջիկների հոսքը մեր երկիր: Անհրաժեշտ է վերանայել մշակույթին վերաբերող՝ գուցե առաջին հայացքից այդքան էլ կարեւոր չթվացող ամեն բան»,- «Առավոտին» հայտնեց երաժիշտը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
Կարդացեք նաև
14.05.2015
