ՀՀԿ գործադիր մարմնի նիստից հետո ՀՀԿ խոսնակ Էդուարդ Շարմազանովն ասաց, որ Հայաստանը շատ է կարևորում ԵՄ հետ երկխոսության շարունակությունը: «Մենք էլ, եվրոպացիներն էլ գտնում ենք, որ մեր հարաբերությունները պետք է շարունակենք : Հայաստանը կարևորում է ԵՄ հետ քաղաքական երկխոսության շարունակությունը, նման շահագրգռվածություն ունենք մենք եւ տեսնում ենք նաև եվրոպացի գործընկերների մոտ»,- ասաց պարոն Շարմազանովը:
Ինչ վերաբերում է Ռիգայի գագաթաժողովին հայկական պատվիրակության կազմին, ասաց, որ այդ մասին նախագահի աշխատակազմը կտեղեկացնի:
Անդրադառնալով Թուրքիայի վարչապետի հայտարարությանը, թե Ռուսաստանը օկուպանտ է եւ պատասխանելով հարցին, թե նման կոշտ դիրքորոշումը պայմանավորվա՞ծ է ՌԴ-ի վերաբերմունքով Հայոց ցեղասպանության նկատմամբ, Շարմազանովն ասաց, թե ՌԴ-ն իր պաշտպանության կարիքն չունի. «Բայց տարօրինակ է, որ օկուպացիայի վերաբերյալ, հարևանի կամ պետություններից մեկին օկուպանտ անվանելու իրավունք ունի Թուրքիայի քաղաքական վերնախավի ներկայացուցիչը, այդ թվում նաև վարչապետը: Մի պետություն, որը օրը ցերեկով օկուպացված է պահում Կիպրոսի հանրապետության 37 տոկոսը, փակ է պահում ՀՀ-ի հետ սահմանը, մի պետություն, որը զրոյի հասցրեց բոլոր հարևանների հետ հարաբերությունների հնարավորությունները, չեմ կարծում, որ նման իրավունք ունի»:
Արփինե ՍԻՄՈՆՅԱՆ
