Մայիսի 17-ին, Հայաստանի մի շարք համայնքներում կանցկացվեն համայնքների խոշորացման հարցով հանրաքվե: Այն կունենա դեռեւս փորձնական բնույթ, որը կիրառվելու է 3 մարզերում` Լոռիում, Սյունիքում եւ Տավուշում:
Կառավարության եւ բնակիչների կարծիքները դեռեւս հակասական են` կառավարությունը ասում է, որ արդյունավետ ծրագիր է, համայնքների խոշորացմամբ կառավարումը ավելի հեշտ կլինի եւ մեծ գումարներ կկրճատվեն, իսկ բնակչությունը տեսնում է գործազրկություն եւ փոքր համայնքների վերացման վտանգ: «Մեդիա նախաձեռնությունների կենտրոնը» լրագրողների համար երեկ հանդիպում էր կազմակերպել Ալավերդու քաղաքպետարանում, որին մասնակցում էին քաղաքապետ Արտավազդ Վարոսյանը, փորձագետ Հայաստան Ստեփանյանը, խոշորացման ծրագրում ներառված Քարինջ համայնքի ներկայացուցիչներ:
«Մինչեւ մարզպետի գալը ժողովուրդը ուրիշ կարծիքի էր, կար տրամադրվածություն, որ մեծամասնությունը ասի ոչ, բայց մարզպետի գալուց հետո, երեւի մեր մարզպետը նորմալ ներկայացրեց բնակչությանը, որն էլ ասեց կարելի է հարգված մարդու ասած խոսքը ընդունել»,-ասաց Քարինջ համայնքի ներկայացուցիչ Սամվել Մխիթարյանը:
Իսկ փորձագետ Հայաստան Ստեփանյանն էլ ասաց, որ սրանք փորձնական ծրագրեր են, եւ մեր գիտելիքները դեռեւս տեսական են: «Տվյալ տարածքի համար դեռ չեն հաշվել բոլոր ռիսկերը, օրինակ` եթե միավորվում են համայնքները, ենթակառուցվածքները ոնց են աշխատելու, բոլոր համայնքներում պահպանելու են նախադպրոցական հաստատությունները, ավագ դպրոցը, միջնակարգ դպրոցը, կամ ո՞վ է իրականացնելու աղբահանությունը, ինչպե՞ս են իրականացնելու, ինչպե՞ս են վերանորոգվելու ճանապարհները եւ ի՞նչ միջոցների հաշվին, սրանք խնդիրներ են, որ պետք է մտածել»:
Կարդացեք նաև
Քարինջ գյուղի բնակիչներից մեկը, որը չցանկացավ ներկայանալ, «Առավոտի» հետ զրույցում նշեց, որ ոչ միայն բնակչությունն է դեմ, այլեւ իրենց գյուղապետը, բայց, քանի որ «ծառայող» մարդ է չի կարող ընդդիմանալ:
Մարց համայնքի բնակիչ Հրաչիկ Հովհաննիսյանն էլ ասաց. «Ես աշխատած մարդ եմ, գիտեմ, որ այս բոլորը սուտ է, ուզում ա ասենք այո, ուզում ա ասենք` ոչ, որոշել են պիտի անեն»:
Նյութի մանրամասները կարդացեք վաղվա տպագիր «Առավոտ»-ում
Անուշ ՄԱԹԵՒՈՍՅԱՆ
