Այսօր ՀՀԿ խմբակցության պատգամավոր Խոսրով Հարությունյանը «Տեսակետ» ակումբում սահմանադրական բարեփոխումների մասին խոսելիս ասաց, որ Քրիստոնեա-դեմոկրատական միություն կուսակցությունը առաջարկություններ է ներկայացրել հանձնաժողովին:
Aravot.am-ը հետաքրքրվեց՝ սահմանադրական բարեփոխումների հետ կապված՝ ընդդիմախոսները երկու թեզ են առաջ քաշում: Մեկն այն է, որ այս իշխանություններն ի վիճակի չեն որեւէ լավ բան անեն, դրա համար դեմ ենք, եւ երկրորդը՝ այն նպաստելու է այս իշխանության վերարտադրմանը: Ի՞նչ կարծիք ունեք այս երկու թեզերի մասին:
Խոսրով Հարությունյանը պատասխանեց. «Առաջին թեզը միանգամից եմ մերժում: Ինչ վերաբերում է նրան, որ խորհրդարանական համակարգին անցումը հնարավորություն է ՀՀԿ-ի համար՝ լավ, միգուցե: Բայց ես այդ դեպքում հարց եմ տալիս՝ 2012-ին ԲՀԿ-ն, ՀՅԴ-ն, «Ժառանգությունը» չէ՞ որ առաջ էին քաշում սահմանադրական բարեփոխումների հարցը՝ անցում կատարելով կիսանախագահականից խորհրդարանականի: Միակ կուսակցությունը, որ դրա մասին չէր խոսում՝ ՀՀԿ-ն էր: Բա նրանք ինչի՞ մասին էին այդ ժամանակ մտածում, ի՞նչ էին ենթադրում: Ինչո՞ւ այդ ժամանակ այդ հարցը չէին տալիս: Գտնում եմ, որ դա կեղծ քաղաքական հարցադրում է: Վերջիվերջո ՀՀԿ-ն նախաձեռնեց այն, ինչ իրենք էին ուզում: Հիմա ինչո՞ւ են դեմ: Ես որեւէ մեկից հոդաբաշխ մեկնաբանություն չեմ ստացել: Այսինքն, եթե մենք չենք անում՝ վե՞րջ»:
Մեր դիտարկմանը, որ ասում են՝ հիմա ժամանակը չէ՝ Խոսրով Հարությունյանը պատասխանեց. «Ինչո՞ւ 2012-ին նախագահական ընտրություններին ժամանակն էր, բայց հիմա՝ ժամանակը չէ: ՀՀԿ-ն երբեւէ այդ անցման վերաբերյալ հստակ կարծիք չի հայտնել»:
Կարդացեք նաև
Նա վստահեցրեց, որ Սերժ Սարգսյանը, նախաձեռնելով սահմանադրական բարեփոխումները, այսպես ասած, զիջումների է գնացել՝ ընդդիմադիրների համար. «Սերժ Սարգսյանն ասաց, լավ, հարգելի՛ ընդդիմախոսներ, եթե ձեզ համար դա կարեւոր է այդքան, ես պատրաստ եմ գնալ դրան: Որպես հետեւողական քաղաքական գործիչ՝ շարունակեց իր գործը: Նա երբեք չասաց՝ կողմ եմ խորհրդարանական կառավարման համակարգին: Նա մի նպատակ է հետապնդում՝ փորձել իր քաղաքական ընդդիմախոսների հետ այս կերպ ձեւավորել համագործակցության հնարավորություն: Անկեղծ ասեմ, ՀՀԿ-ում ուղղակի զարմացած էին, որ այդպես կոշտ ընդդիմացան այս նախաձեռնությանը: Թվում էր, թե ակնհայտ է, որ առաջարկում ենք այն, ինչ իրենք ուզում էին: Եվ այստեղ փորձել այլ մեկնաբանություն ներկայացնել ՀՀԿ-ի քաղաքական վարքին, երբ ընդդիմությունն ակնհայտորեն իր իսկ խոստումներին դեմ է գնում՝ բացառությամբ ՀՅԴ-ի, ինձ համար հասկանալի չէ»:
Հռիփսիմե ՋԵԲԵՋՅԱՆ
