Երեկ Իսպանիայի Սենատի լիագումար նիստի ընթացքում տեղի ունեցան լսումներ՝ Հայոց Ցեղասպանության թեմայով։ Բոլոր քաղաքական ուժերը ներկայացնող բանախոսները համակարծիք էին, որ տեղի ունեցածը մարդկության պատմության մեծագույն ողբերգություններից է և որ յուրաքանչյուրը կիսում է հայ ժողովրդի ցավը և սգում անմեղ նահատակների կորուստը։
Իսպանիայում Հայաստանի դեսպանության Ֆեյսբուքյան էջում տեղադրված գրառումից տեղեկանում ենք, որ քվեարկության է դրվել միջնորդագիր՝ ուղղված Իսպանիայի կառավարությանը, որում կոչ էր արվում հստակ քայլեր ձեռնարկել Հայոց Ցեղասպանության 100-րդ տարելիցի շրջանակներում։ Այդուհանդերձ, իշխող Ժողովրդական կուսակցություն խմբակցությունը (Grupo Parlamentario Popular, GPP), որը Սենատում մեծամասնություն է կազմում, հայտարարեց, որ քվեարկելու է դեմ և միջնորդագիրը մերժվեց։
Նշենք, որ թուրքական «Anadolu» գործակալությունն էլ հաղորդել է, թե միջնորդագրին կողմ է քվեարկել 14 պատգամավոր, դեմ` 130 պատգամավոր: Ձեռնպահ է մնացել 68 պատգամավոր: Օրինագծին կողմ են քվեարկել բասկերը:
Պատրաստեց Աշոտ ԻՍՐԱԵԼՅԱՆԸ
