Ովքեր հետաքրքրված են իրենց առողջության պահպանմամբ, հավանաբար լավ գիտեն, թե օմեգա-3-ը որքան կարեւոր է օրգանիզմին: Ապագա երեխայի ուղեղի եւ աչքի ցանցաթաղանթի ձեւավորման համար եւս շատ կարեւոր է այս ճարպաթթուն: Եթե հղիության ընթացքում ապագա մայրը քիչ է օգտագործում օմեգա-3, ապա հավանականությունը մեծանում է, որ երեխան ծնվելուց հետո նյարդաբանական խնդիրներ կունենա: Մաշկային շատ բորբոքային երեւույթներ, այդ թվում՝ պզուկների առաջացումը տեղի է ունենում օմեգա-3-ի բացակայության դեպքում:
Բժիշկները նշում են, որ բժշկական պրակտիկայում կան դեպքեր, երբ սուր փսորիազով տառապողները ընդամենը 1 շաբաթ մեծ չափաբաժնով ձկան յուղի բուժման կուրս են ընդունել եւ սկսել է առողջությունը բարելավվել:
Օմեգա-3-ը բազում գործառույթներ է իրականացնում մարդու օրգանիզմում, իսկ անբավարարության դեպքում վնասվում է օրգանիզմի ֆունկցիոնալ համակարգը` առաջացնելով մի շարք հիվանդություններ: Այն կարգավորում է նյութափոխանակությունը, արյան ճնշումը, նվազեցնում է ուղեղի եւ սրտի կաթվածի հավանականությունը, բարձրացնում է դիմադրողականությունը: Ինչպես նաեւ լավացնում է ուղեղի աշխատանքը, մաքրում է մաշկը՝ դարձնում է փափուկ եւ ձիգ, մեծացնում տեստոստերոնի սինթեզը, իջեցնում է խոլեստերինի մակարդակն արյան մեջ, անոթները պահպանում նորմալ վիճակում, բարելավում է սրտանոթային համակարգը:
Կարդացեք նաև
Ովքեր ցանկանում են բարելավել իրենց առողջությունը, օրական խորհուրդ է տրվում ընդունել 1-1,5 գրամ օմեգա 3:
Ճարպաթթվի լավագույն աղբյուրը համարվում է ծովային յուղոտ ձուկը (սկումբրիա, ծովատառեխ, սաղմոն, թունա, իշխան): Բացի այդ, օմեգա-3 յուղը կարելի է գտնել բուսական յուղերի՝ կտավատի, եգիպտացորենի, արեւածաղկի, ձիթապտղի մեջ, նաեւ ընկույզի, նուշի, դդմի, սպանախի եւ այլ կանաչեղենի:
Ամենաշատ օմեգա-3 պարունակում է ձկան յուղը` 100 գրամում 99.9 գ, իսկ նույնքան կտավատի սերմերը` 18,1 գ, ձողաձուկի լյարդը` 15 գ, կտավատի յուղը` 10,3 գ, ձիթապտղի յուղը` 9 գ: Կանեփի սերմերը 8,1 գ օմեգա-3 են պարունակում, իսկ ընկույզը` 6,8 գրամ:
Որպեսզի օրգանիզմը ստանա օմեգա-3 ճարպերի առավելությունները, պետք է սննդակարգում ներառել 100 գ յուղոտ ձուկ եւ սոված փորին խմել 2 թեյի գդալ սառը ճզման ենթարկած կտավատի ձեթ:
Կտավատի ձեթը պետք է առնել այնքան, որ բացելուց հետո 20 օրվա ընթացքում վերջացնեք: Այն պահում են սառնարանում եւ օրը մի քանի անգամ շիշը պետք է թափահարել:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
13.05.2015 թ.
