Լեռնային Ղարաբաղի հակամարտությունը ՆԱՏՕ-ի առանցքային թեմաներից մեկն է: Այս մասին Azernews-ի հետ զրույցում ասել է ՆԱՏՕ-ի գլխավոր քարտուղարի Հարավային Կովկասի ու Կենտրոնական Ասիայի հարցով հատուկ ներկայացուցիչ Ջեյմս Ափաթուրայը:
Ափաթուրայը կարևորել է Հայաստան-Ադրբեջանի վեճի հանգուցալուծման ուղղությամբ կատարվող աշխատանքները: «ՆԱՏՕ-ն չունի անմիջական դերակատարություն Լեռնային Ղարաբաղի հակամարտության կարգավորման գործընթացում: Փոխարեն մենք աջակցում ենք Մինսկի գործընթացին»:
Ափաթուրայը նաեւ անհանգստություն է հայտնել շփման գծում պարբերական բնույթ կրող սրացումների վերաբերյալ: «Մենք մտահոգված են վատթարացող իրավիճակի վերաբերյալ: Չկա հակամարտության ռազմական լուծում եւ ես հույս ունեմ, որ քաղաքական գործընթացը արդյունք կունենա: ՆԱՏՕ-ն կարող է միայն լրացուցիչ դեր խաղալ. քաղաքական գործիչների, դիվանագետների, ինչպես նաեւ Հայաստանի ու Ադրբեջանի զինվորականների շփումներ բազմակողմ հանդիպումների ժամանակ: Ես հույս ունեմ, որ այսպիսի շփումները դրական ազդեցություն կունենան եւ ուրախ եմ տեսնել, որ նախագահներ Սերժ Սարգսյանն ու Իլհամ Ալիեւը հանդիպել են ՆԱՏՕ-ի անցած տարվա գագաթաժողովի ընթացքում»:
Պատրաստեց Աշոտ ԻՍՐԱԵԼՅԱՆԸ
