Այսօր Գյումրու քաղաքապետ Սամվել Բալասանյանը պարգեւատրեց տարբեր սպորտաձեւերում հաղթանակ տարած գյումրեցի մարզիկներին ու նրանց մարզիչներին:
Ծանրամարտի Եվրոպայի առաջնությունում 1-ին տեղը գրաված Տիգրան Մարտիրոսյանը պարգեւատրվեց 1 միլիոն դրամով, նրա մարզիչը՝ 200 հազար դրամով, հունահռոմեական ոճի ըմբշամարտում մինչեւ 23 տարեկանների առաջնությունում 3-րդ տեղը գրաված Կարապետ Չալյանը 150 հազար դրամ եւ այսպես շարունակ:
Կարդացեք նաև
Ընդհանուր առմամբ պարգեւատրվեցին 10 հոգի՝ ընդհանուր գումարը քաղաքային բյուջեի վրա նստեց 1.800.000 դրամ:
Սամվել Բալասանյանը նրանց հետ հանդիպման ժամանակ խոսեց տարբեր թեմաներից՝ սպորտդպրոցների պայմաններից, Բաքու գնալու վտանգից, Թբիլիսում հայ ու ադրբեջանցի մարզիկների միջեւ տեղի ունեցած բախումներից, գործարարների՝ սպորտսմեններին չհովանավորելուց եւ այլն:
Այնուհետ դիմելով Եվրոպայի չեմպիոն Տիգրան Մարտիրոսյանին՝ հետաքրքրվեց. «Տիգրանիս հալալ է, շատ եմ սիրում, ծանրամարտը մեզ ամենաբարձր տեղն է հասցրել , հունահռոմեականը՝ նույնպես, Տիգրան ջան, աշխարհ գնալո՞ւ ես»: Չեմպիոնը պատասխանեց՝ անպայման, նոյեմբերին, որին քաղաքապետը արձագանքեց ամենաթունդ երկրպագուի պես՝ աղաչելով. «Մի հատ էդտեղ փայլուն վարկանիշ ցույց տաս, մի հատ էլ օլիմպիականում հուպ տաս , էդ կլինի գիտես ինչ…Գոնե մի օլիմպիական չեմպիոն իմ ժամանակահատվածում ունենանք, ես միշտ երազել եմ, թե երբ պիտի մի բռնցքամարտիկ ունենանք…»:
Հիշեցնենք, որ Սամվել Բալասանյանը բռնցքամարտի ֆեդերացիայի նախագահն է:
Նունե ԱՐԵՎՇԱՏՅԱՆ
