ՀՅԴ Երիտասարդական միության ներկայացուցիչները այսօր ներկայացրել են մայիսի 8-9 Երեւանում անցկացված ընկերվար երիտասարդական միջազգային կազմակերպության խորհրդաժողովի արդյունքները:
Նիկոլ Աղբալյան ուսանողական միության վարչության անդամ Արմեն Մխչյանն այսօր «Փաստարկ» ակումբում պատմեց, որ համաժողովին իրենք ներկայացրել էին հայոց ցեղասպանության ճանաչման ու հատուցման բանաձեւ, որը ընդունվել է միաձայն. «Ճիշտ է՝ այն իրավական ուժ չունի, բայց հնարավորություն է տալիս սոցիալիստական կուսակցությունների ու միությունների երիտասարդներին լոյալ վերաբերմունք ունենալ Հայաստանի ու հայկական հարցի վերաբերյալ: Հետագայում, երբ նրանք կմտնեն մեծ քաղաքականություն, արդեն կունենան հստակ ձեւավորված պրոհայկական կարծիք»:
Նրա խոսքով, համաժողովի ընթացքում քննարկվել են նաեւ մարդու իրավունքների խախտումների, իրավունքների հավասարության ու նման կոնֆլիկտների շուրջ հարցեր:
Մասնակցել են 60 երկրի 160 մասնակից: Նրանց կողմից կոշտ ելույթներ են հնչել՝ ուղղված Թուրքիային, որով պահանջում էին դատապարտել հայոց ցեղասպանությունը:
Կարդացեք նաև
Համաժողովն անցկացվում է երկու տարին մեկ: Իսկ ընկերվար երիտասարդական միջազգային կազմակերպությունը ստեղծվել է 1907 թվականին Բեռլինում, համախմբում է աշխարհի տարբեր սոցիալիստական ուղղվածության կազմակերպություններին ու երիտթեւերին:
Արփինե ՍԻՄՈՆՅԱՆ
