Սիդնեյի հյուսիսային ափում գտնվող Վիլաբեյ (Willoughby) քաղաքի ավագանին ընդունել է բանաձեւ, որով ճանաչվում է Հայոց ցեղասպանությունը: Այս մասին հաղորդում է Ավստրալիայի հայկական ազգային հանձնախումբը:
Բանաձեւում գրված է. «Վիլաբեյ քաղաքի ավագանին ճանաչում է Օսմանյան կայսրության կողմից 1915-ից 1922 թվականների ընթացքում իրականացրած հայերի, հույների եւ ասորիների ցեղասպանությունը, ինչպես նաեւ մարդկության դեմ իրականացված բոլոր ցեղասպանությունները, որպես մնացած բոլոր անհանդուրժողականությունների վերջին ակտ»:
Նշվում է, որ նախաձեռնության հեղինակն է հայ-ավստրալիական համայնքի ընկեր, ավագանու անդամ Ջոն Հուպերը: Բանաձևը միաձայն է ընդունվել եւ այդպիսով Վիլաբեյ քաղաքը դարձել է Ավստրալիայի երկրորդ քաղաքը, որը ճանաչել է Հայոց ցեղասպանությունը:
Ավստրալիայի հայկական ազգային հանձնաժողովի գործադիր տնօրեն Վաչե Ղահրամանյանը կոչ էր արել ավագանու հանդիպման ընթացքում խոսել բանաձեւի օգտին եւ Հայոց ցեղասպանության ճանաչման մասին՝ որպես հետագա ցեղասպանությունների կանխարգելման մեխանիզմ:
Կարդացեք նաև
Բանաձեւի ընդունումից հետո Ղահրամանյանը նշել է. «Ես շնորհակալություն եմ հայտնում ավագանու անդամ Հուպերին եւ Վիլաբեյ քաղաքի ավագանու անդամներին՝ Հայոց ցեղասպանությունը պաշտոնապես ճանաչելու համար: Այսպիսի շարժումները ամենապարզ ազդանշանն են ուղարկում այն մասին, որ ցեղասպանության մերժումը տեղ չունի 21-րդ դարում»:
Նա նաեւ հավելել է, որ ցեղասպանության ճանաչման վերաբերյալ ազգային շարժում կա Ավստրալիայում, ինչը այդ երկրի խորհրդարանին կուղղորդի Հայոց ցեղասպանության վերաբերյալ պատմական իրականության հաստատմանը:
Պատրաստեց Աշոտ ԻՍՐԱԵԼՅԱՆԸ
