«Ազատություն քաղբանտարկյալներին» նախաձեռնությունն իր երթը շարունակեց դեպի Մատենադարան, որտեղից Հիմնադիր խորհրդարանը հայտարարել էր, որ շարժվելու են դեպի կալանավայրեր: Մատենադարանի մոտ հավաքվածներին այնուհետեւ մոտեցան Հիմնադիր խորհրդարանի կալանքից վերջերս ազատված անդամները՝ Ժիրայր Սեֆիլյանը, Գարեգին Չուգասզյանը, Վարուժան Ավետիսյանը, Պավել Մանուկյանը եւ Գեւորգ Սաֆարյանը:
Ժիրայր Սեֆիլյանը լրագրողների հետ զրույցի ընթացքում ասաց, որ Հայաստանի իշխանությունները չունեն այն ռեսուրսը, որն ունի Հյուսիսային Կորեայի իշխանությունը. «Ամբողջությամբ անհիմն մարդկանց փակելու համար ռեսուրսն իրենք չունեն: Այսինքն՝ նամանավանդ, այն ժամանակահատվածում, երբ իրենք փորձում են իրենց իշխանությունը երկարացնել եւ այդ նպատակով մուրացկանությամբ զբաղվել՝ Արեւմուտքից ինչ-որ կոպեկներ ակնկալելով: Նամանավանդ, աշխարհաքաղաքական այս վիճակում նրանք իրենց իշխանությունը չեն կարող երկար պահել: Ես այն կարծիքին եմ, որ օրեր անց ուզած, թե չուզած մեր գործը պետք է կարճեն: Եթե ռեսուրսներ ունենային, տարիներ կպահեին, մեզ ազատ չէին արձակի»:
Հարցին, թե հնարավո՞ր է գործը կարճելուց հետո իրենք դիմեն դատարան, Ժիրայր Սեֆիլյանը պատասխանեց. «Ես վստահ եմ, որ մեր հանդեպ ընտրված խափանման միջոցը պետք է վիճարկվի դատարանում մինչեւ ամենաբարձր ատյաններ: Այս գործն ամբողջությամբ անհեթեթություն է, եթե համարձակվեն եղած փաստերով մտնել դատարան, ավելի վատ իրենց համար»:
Կարդացեք նաև
Aravot.am-ի հարցին, թե Ժիրայր Սեֆիլյանը վստահո՞ւմ է Հայաստանի դատարաններին, թե՞ կարծում է, որ գործը կհասնի Մարդու իրավունքների եվրոպական դատարան, նա պատասխանեց. «Արդարությունը վերականգնելու համար միշտ պետք է քայլեր կիրառել: Սակայն մեր երկիրը մեր պատկերացրած որակյալ պետության վերածելու գործում մենք մեր հույսը դնում ենք մեր վրա»:
Հիմնադիր խորհրդարանի անդամները մեքենաներով եւ ավտոբուսներով շարժվեցին դեպի կալանավայր:
Ամի ՉԻՉԱԿՅԱՆ
