Չինաստանի Ժողովրդական Հանրապետության դեսպանությունը և ԵՊՀԼ Կոնֆուցիուսի ինստիտուտն արդեն երկրորդ անգամ են Հայաստանում անցկացնում «Չինարենի կամուրջ» միջոցառումը: Վերջինս չինարենի մրցույթ է, որի հաղթողին հնարավորություն է տրվում Չինաստանում մասնակցելու «Չինարենի կամուրջ» միջազգային մրցույթի եզրափակիչ փուլին:
Հայաստանում մրցույթին մասնակցում է 8 հոգի: Նրանք նախապես ներկայացրել են գրավոր աշխատանք և անցնելով երկրորդ փուլ՝ այսօր ժյուրիի և միջոցառման մասնակիցների առջև հանդես եկան բանավոր ելույթով, չինարեն մշակութային համարով, ինչպես նաև պատասխանեցին ժյուրիի անդամների հարցերին:
Հաղթող կճանաչվի նրանցից մեկը, որը, ինչպես արդեն նշեցինք, կմեկնի Չինաստան և այնտեղ կմասնակցի «Չինարենի կամուրջ» միջազգային մրցույթի եզրափակիչ փուլին:
Կարդացեք նաև
«Հայաստանի ու Չինաստանի միջև գոյություն ունեն մինչև պատմության խորքը հասնող հին բարեկամական հարաբերություններ, որոնց ամրապնդմանն էլ ավելի կնպաստի այս միջոցառումը»,- ողջունելով ներկաներին՝ ասաց ՀՀ-ում Չինաստանի Ժողովրդական Հանրապետության արտակարգ և լիազոր դեսպան Թիան Էրլունին՝ նկատելով, որ մրցույթի անվան մեջ պատահական չէ տեղ գտել «կամուրջ» բառը, քանի որ այս միջոցառումը կամրջում, միմյանց է կապում երկու տարբեր մշակույթներ՝ հայկականն ու չինականը:
«Այս մրցույթը մեզ համար կարևոր է նաև նրանով, որ նպաստում է Հայաստանում չինարենի և չինական մշակույթի տարածմանը: Ի դեպ, ես նկատել եմ, որ աճել է հայերի ու չինացիների հետաքրքրությունը միմյանց մշակույթների ու լեզուների նկատմամբ: Չմոռանանք, որ Հայաստանում չինարենի արդեն երրորդ կենտրոնն է բացվում»,- ընդգծեց Թիան Էրլունին :
«Հաճելի է երկրորդ անգամ ներկա գտնվել հայ-չինական բարիդրացիական հարաբերությունները խորհրդանշող այս միջոցառմանը,- նշեց ՀՀ ԱԺ փոխնախագահ Հերմինե Նաղդալյանը.- սա վկայում է այն մասին, որ մեր երկու երկրները հետևողական են երկկողմ հարաբերությունները զարգացնելու հարցում։ Ուզում եմ ընդգծել, որ մեր երկու երկրների միջև առկա են բարձր մակարդակի հարաբերություններ, որի մասին է վկայում նաև ՀՀ նախագահի՝ վերջերս Չինաստան կատարած այցը»:
Սիրանուշ ՀԱՅՐԱՊԵՏՅԱՆ
