Տավուշի մարզի Ադրբեջանին սահմանամերձ, արտոնություններից օգտվող 24 համայնքների բնակիչները ազատված են շենք-շինությունների համար գույքահարկ, հողերի համար հողի հարկ վճարելուց: Այդ հարկերի գումարների չափով պետական բյուջեից նշված համայնքներին ֆինանսական աջակցություն է տրվում: 2014 թվականի համար նախատեսված գումարները համայնքներին վաղուց փոխանցվել են, սակայն մարզի որոշ համայնքապետարաններ գույքահարկի եւ հողի հարկի տվյալների բազայում համապատասխան մուտքագրումներ չեն կատարել: Ապրիլի 28-ին մարզպետարանում կայացած խորհրդակցությունում մարզպետ Հովիկ Աբովյանն այդ կապակցությամբ հանդիմանել է թերացող համայնքների ղեկավարներին:
Տավուշի մարզպետարանի աշխատակազմի ֆինանսական եւ սոցիալ-տնտեսական զարգացման վարչության պետ Ռոբերտ Ներսիսյանին հարցրինք, թե այդ դրանից հետո ի՞նչ է փոխվել: Նա հայտնեց, որ դրական տեղաշարժ կա, թերացած համայնքապետարանները համայնքների միությունների հետ հողի հարկի եւ գույքահարկի բազաներում մուտքագրումներ եւ ճշգրտումներ են կատարում, այդ գործը որոշակի ժամանակ է պահանջում: Ռ. Ներսիսյանի վկայությամբ՝ գործընթացը կարեւոր է, որպեսզի պետական բյուջեից 2015 թվականի համար նախատեսված ֆինանսական աջակցության գումարները փոխանցվեն սահմանամերձ համայնքներին:
Մարզպետի լուսանկարը՝ tavush.gom. am կայքից
Ոսկան ՍԱՐԳՍՅԱՆ
