«Ինչպես ԵՄ դիրքորոշումը, մեր դիրքորոշումը մեկն է, քանի որ մենք չենք ճանաչում ԼՂՀ-ն որպես պետություն: Այդ պատճառով զերծ ենք մնում որեւէ մեկնաբանությունից, քանի որ ԼՂՀ-ի պետականությունը մեր կողմից ճանաչված չէ: Չենք ցանկանում անդրադառնալ արդյոք դա ընտրության լա՞վ օրինակ է, թե՞ օրինակ չէ»,- մայիսի երկուսին ԼՂՀ խորհրդարանական ընտրությունների մասին ասաց Հայաստանում Լեհաստանի դեսպան Եժի Մարեկ Նովակովսկին՝ պատասխանելով Aravot.am-ի հարցին, թե համամի՞տ եք միջազգային դիտորդների գնահատականներին, թե միջազգային ստանդարտներին համապատասխան ընտրություններ էին:
Հարցին, թե եվրոչինովնիկները բազմիցս հայտարարել են, որ ԼՂՀ կոնֆլիկտի կարգավորումը ԵՄ համար առաջնահերթություն է, ի՞նչ քայլեր է դա ենթադրում է եւ ինչքանով է հավանական Հայաստանի ու Ադրբեջանի միջեւ լայնամասշտաբ պատերազմի վերսկսումը ու ինչպես կարձագանքի դրան ԵՄ-ը, պարոն Նովակովսկին պատասխանեց. «Մենք լիահույս ենք, որ պատերազմի վերսկսման հնարավորություն չի լինի ու լայնամասշտաբ գործողություններ չեն իրականացվի: Մենք կողմ ենք հակամարտության խաղաղ կարգավորմանը, Լեհաստանը աջակցում է Մինսկի խմբի գործողություններին ու քայլերին այդ խնդիրը կարգավորելու հարցում, գտնում ենք, որ կողմերի ուղղակի շփումների ու երկկողմ բանակցությունների արդյունքում պետք է լուծվի այդ հարցը»:
Արփինե ՍԻՄՈՆՅԱՆ
