ԼՂՀ Քաշաթաղի շրջկենտրոն Բերձորի Վ. Թեքեյանի անվ. թիվ 1 միջն. դպրոցի առաջին դասարանում սովորում են 15 աշակերտ: Մայիսի 6-ին իրենց կրթօջախի դահլիճում նրանք՝ դասվար Վալենտինա Բաղդասարյանի ղեկավարությամբ ներկայացան «Հրաժեշտ Այբբենարանին» հանդեսով: Սկզբում բոլորը ծաղիկներ էին, մեկը՝ թիթեռ, որ ծաղկեծաղիկ թռչելով՝ ըմբոշխնում էր գարնան բույրը:
Այնուհետև Հայոց գրերին, նրանց ստեղծող Մաշտոցին նվիրված երգերով, ասմունքով ներկայացան փոքրիկները՝ իրենց ծնողներին, ուսուցիչներին, հյուրերին հավաստելով, որ արդեն գրագետ են, կարող են կարդալ ու գրել, գիտեն գրի ուժն ու արժեքը:
Աշակերտների ելույթին զուգահեռ՝ էկրանին Հայոց գրերին նվիրված տեսաֆիլմ էր ցուցադրվում, որի որոշ հատվածներ կազմակերպիչների ստեղծածն էր: Մաշտոցյան տառ-հնչյուններով էին աշակերտները ներկայացնում իրենց սիրելի էակներին ու առարկաները, երևույթները: Այսպես՝ Մ-ն սիրելի մայրիկն է, Հ-ն՝ հայրիկը, Պ-ն՝ պապիկը, Տ-ն՝ տատիկը և այդպես շարունակ:
Կարդացեք նաև
Հանդեսի վերջում փոքրիկները բարեմաղթանք հղեցին ավագ ընկերներին՝ 12-րդ դասարանցիներին, ովքեր շուտով հրաժեշտ են տալու դպրոցին: Իսկ 12-րդցիները նրանց համար նվերներ էին պատրաստել, որոնք հանձնեցին սիրով:
Շրջվարչակազմի աշխատակազմի կրթության բաժնի առաջատար մասնագետ սիրվարդ Թամազյանը ողջունեց ու շնորհավորեց առաջին դասարանցիներին՝ մաղթելով հաջողություններ, շնորհակալություն հայտնեց դասվարին՝ լավ աշխատելու համար: Բարի երթ ցանկացավ նաև շրջանավարտներին, ովքեր շուտով նոր կյանք կմտնեն:
Ցերեկույթին ներկա էին դպրոցի տնօրեն Անահիտ Քոսակյանը, ուսուցիչներ, աշակերտներ, ծնողներ, հյուրեր:
Զոհրաբ ԸՌՔՈՅԱՆ
