Արեւելքում գեղեցիկ կնոջ դեպքը համեմատել են թավշյա դեղձի հետ: Դեղձը առաջին անգամ հայտնաբերել են Չինաստանում, որը համարվում է բնության հրաշալի նվերը մարդկանց, իսկ դեղձի կորիզից ստացված յուղը հիանալի միջոց է դեմքի մաշկը խնամելու համար: Այն պարունակում է վիտամիններ A, P (30-40%), E, C, B, մի շարք մակրո եւ միկրոտարրեր, կալիում, կալցիում, ֆոսֆոր, երկաթ:
Այս յուղը խորհուրդ է տրվում օգտագործել հատկապես գարնանը, քանի որ այն վերականգնում է դեմքի մաշկի առաձգականությունը, սնուցում եւ թարմացնում է մաշկը: Հայտնի է նաեւ իր երիտասարդացնող հատկությամբ: Օգտակար է չոր մաշկի դեպքում, չի առաջացնում ալերգիկ ռեակցիաներ, այն նույնիսկ օգտագործում են երեխաների մաշկի խնամքի դեպքում:
Դեղձի յուղը օգտագործում են ոչ միայն դեմքի մաշկի՝ հատկապես աչքերի խնամքի դեպքում, այլեւ մարմնի, մազերի, շուրթերի եւ մաշկային հիվանդությունների դեպքում՝ այրվածքների, էկզեմայի, ցելյուլիտի: Դեղձի յուղը կանխարգելում եւ վերացնում է բորբոքային ռեակցիաները, նպաստում է եղունգների արագ աճին՝ դարձնելով դրանք ավելի ամուր եւ փայլուն:
Դեմքի հոգնած եւ թոշնած մաշկը եւ նույնիսկ մանր կնճիռները կարող են անհետանալ, եթե 1 ամիս՝ ամեն օր, դեմքին դեղձի յուղ քսեք: Զգայուն մաշկի դեպքում 1 ճաշի գդալ կաթնաշոռին կամ սերուցքին ավելացնում եք 10 կաթիլ դեղձի յուղ եւ քսում մաքուր դեմքին: Դիմակը կարող եք հանել 20 րոպեից՝ դեմքը լվանալով տաք, ապա սառը ջրով:
Կարող եք մի քանի յուղեր՝ դեղձ, ավոկադո եւ ժոժոբա, հավասար չափերով խառնել եւ ավելացնել 3 կաթիլ որեւէ եթերային յուղ: Ամեն երեկո բամբակե սկավառակը թաթախեք այս խառնուրդով եւ 15 րոպե դրեք փակ աչքերին, այնուհետեւ բամբակե սկավառակներով նուրբ շարժումներով մերսեք դեմքը եւ վերջում անձեռոցիկի միջոցով հեռացրեք ավելորդ յուղը: Սա 15 օր կիրառելուց հետո դեմքի առողջ տեսքը ապահովված է, բայց անհրաժեշտ է 15 օրից հետո 1 ամիս էլ շաբաթը մեկ անգամ եւս օգտագործել քսուքը՝ դեմքի գեղեցկությունը պահելու համար:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
06.05.2015
