«Բնական ֆոլաթթուն որպես վիտամին B9 օրգանիզմում չի կուտակվում, նրա հիմնական մասը յուրացվում է և քանի որ ջրալույծ վիտամին է, նա լուծված վիճակում հեշտությամբ հեռանում է օրգանիզմից և որևէ վտանգ չի ներկայացնում»,- այսօր «Հայելի ակումբում» անդրադառնալով ՝ մանկական սնունդն ու ալյուրը D 9 վիտամինով (ֆոլաթթու) հարստացնելու մասին՝ առողջապահության նախարարության որոշմանը՝ ասաց «Նանետ» միջազգային էկոլոգիական անվտանգության խորհրդի քարտուղար Դոլորես Ղափանցյանը:
Ըստ նրա. «Բնական ֆոլաթթվի կարիք մեր արևաշատ Հայաստանը չունի , մեր սննդակարգում օգտագործվող բոլոր բույսերը հարուստ են ֆոլաթթվով»: Նա մտահոգված է ու պնդում է, որ ալյուրի հարստացման պարագայում խոսքը գնում է արհեստական ֆոլաթթվի մասին, որն առաջացնում է քաղցկեղածին բազմաթիվ հիվանդություններ. «Ուսումնասիրությունների հիման վրա պարզվել է, որ արհեստական ֆոլաթթուն յուրացվում է շատ վատ, որովհետեւ այն ֆերմենտը, որը պետք է մասնակցի ֆոլաթթվի յուրացմանը, մարդու լյարդում՝ 50 անգամ, առնետների հետ համեմատած, ավելի պակաս է և վատ է յուրացվում: Այս իմաստով ֆոլաթթուն անցնում է արյան մեջ և դրանից մեծ ռիսկեր են առաջանում»:
Նա վստահեցրեց, որ մանկական ասթմաները շատ են այն երեխաների մոտ, որոնց մայրերը հղիության ընթացքում չարաշահել են ֆոլաթթուն: Ֆիզիոլոգիական ինստիտուտի դոկտոր-պրոֆեսոր Խաչիկ Նահապետյանը համաձայնեց Ղափանցյանի հետ, նրանց հետ վիճեց առողջապահության նախարարության աշխատակազմի մայրական ու վերարտադրողական առողջության բաժնի պետ Գայանե Ավագյանը՝ պնդելով, որ միայն Ավստրիան 480 մթերք հարստացնում է ֆոլաթթվով. «Մենք բնածին արատների հաճախականություն ունենք, ֆոլաթթուն մանկական մահացության մակարդակում որոշիչ դեր ունի և նյարդային խողովակի: Ի դեպ, ասեմ, նյարդային խողովակ ունեցող երեխաների մայրերը պատրաստվում են դատի տալ այն բոլոր կազմակերպություններին, որոնք փորձում են խոչընդոտել ֆոլաթթվով հարստացումը, որովհետև իրենք ունեն արատով ծնված երեխա»:
Նա նաեւ վստահեցրեց, որ ֆոլաթթվով հարստացած ալյուրի տուփերում անպայման նշվելու է այդ տեղեկությունը, որ քաղաքացիները ընտրության հնարավորություն ունենան, ֆոլաթթվով հարուստ ալյուրով թխված հացերն էլ փաթեթավորված են լինելու, որ քաղաքացիները կրկին ընտրության հնարավորություն ունենան:
Կարդացեք նաև
Մանրամասները՝ տեսանյութում
Արփինե ՍԻՄՈՆՅԱՆ
