Վերջին տասը տարվա ընթացքում ՀՀ-ում անչափահասների նկատմամբ սեռական բռնության դեպքերի աճ է գրանցվել: Սակայն վերջին տարվա ընթացքում այդ թիվը նվազել է:
Այսօր «Մեդիա կենտրոնում» հրավիրված «Սեռական բռնությունը՝ անչափահասների նկատմամբ Հայաստանում» քննարկմանը ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետի տեղակալ, ոստիկանության գնդապետ Արթուր Վարդանյանը ներկայացրեց վիճակագրությունը. «2013-ին իգական սեռի անչափահասների նկատմամբ գրանցվել է սեռական բռնության 78 դեպք, իսկ 2014-ին՝ 63 դեպք: Իսկ արական սեռի նկատմամբ 2013-ին գրանցվել է 13 դեպք, 2014-ին՝ 3 դեպք»:
Նա նշեց, որ շատ հաճախ պատահական ինտերնետային սոցիալական ցանցերի միջոցով ծանոթություններն են պատճառ դառնում, որ չափահաս մարդիկ օգտվեն այդ առիթից և անչափահասների նկատմամբ սեռական բռնություն իրականացնեն:
Քննչական կոմիտեի քրեական գործերի քննության աջակցության ՀԿԳ ավագ քննիչ Դավիթ Թումասյանը նշեց, որ անչափահասների նկատմամբ սեռական բռնությունների թիվը նվազել է, քանի որ խստացվել է օրենսդրությունը. «Քրեական օրենսգրքի փոփոխությունների համաձայն՝ խստացվեցին պատժատեսակներն ու պատժաչափերը: Ներկայումս մինչև 12 տարի պատժաչափ է սահմանված անչափահասների կամ մանկահասակ երեխաների նկատմամբ սեռական բռնության իրականացման համար: Դա գրեթե հավասարեցվել է բռնաբարության դեպքում սահմանվող պատժաչափին, այն դեպքում, երբ նախկինում ընդամենը տուգանք էր նախատեսված: Ուստի 2013-2014-ին 10-ով նվազել են անչափահաս տղաների և 15-ով անչափահաս աղջիկների նկատմամբ սեռական բռնության դեպքերը, իսկ սեռական հանցագործությունները կանանց նկատմամբ աճել են»:
Կարդացեք նաև
«Սեռական բռնության ճգնաժամային կենտրոն» հ/կ-ի ծրագրերի ղեկավար Տաթևիկ Աղաբեկյանը նշեց, թե իրենք չեն կարող ասել, որ սեռական բռնության ենթարկված կանայք իրենց ավելի շատ են սկսել դիմել. «Մեր «թեժ գծի» վրա ստացվող զանգերից չենք կարող ասել, որ վերջին մեկ տարվա ընթացքում մենք նկատել ենք կանանց նկատմամբ բռնությունների աճ: Հ/կ-ները միանշանակ չեն կարող ասել, որ մենք ավելի շատ սեռական բռնության մասին դեպքեր ենք ստանում: Այս ցուցանիշի գործոններից կարող է լինել այն, որ հաճախ հանդիպում ենք այն դեպքերին, երբ ընտանեկան բռնության դիմած կանայք են սկսում խոսել իրենց նկատմամբ սեռական բռնության մասին»:
Տաթևիկ Աղաբեկյանը նշեց, թե անչափահասների բռնության հետ կապված որոշ բարելավումներ նկատելի են, սակայն չափահաս կանանց նկատմամբ բռնությունների հետ կապված դեռ խնդիրներ շատ կան ու նկատեց. «ՀՀ-ում դրված է, որ եթե սեռական բռնության ես ենթարկվել, միևնույն է՝ մեղավորը դու ես»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոնի»
