Այսօր ԱԺ Մարդու իրավունքների պաշտպանության եւ հանրային հարցերի հանձնաժողովում քննարկվեց Մարդու իրավունքների պաշտպանի 2014-ի զեկույցը:
Օմբուդսմենի տեղակալ Տաթեւիկ Խաչատրյանը ներկայացրեց զեկույցում արդարադատության ոլորտում առկա խնդիրները: Նա նշեց, որ դատական ակտի պատճենահանված 1 էջի համար քաղաքացին պետք է վճարի 150 դրամ, այն դեպքում, երբ մասնավոր ցանկացած պատճենահանման կետում 1 էջն արժե 10-40 դրամ: Պարզ չէ եւ տարօրինակ է սահմանված նման գինը: Ըստ օմբուդսմենի գրասենյակի, այստեղ հակաօրինական չեն գանձում այդ գումարները, պարզապես օրենսդրական փոփոխություն է պետք:
Ըստ օմբուդսմենի զեկույցի, պետք է փոփոխություններ կատարել եւ տեղեկատվության աղբյուրը բացահայտելու նպատակով որպես վկա հարցաքննության չկանչել լրագրողներին: 2014-ին «Հրապարակ» օրաթերթին եւ iLur.am կայքին դատարանով պարտադրվեց բացահայտել տեղեկատվության աղբյուրը: Տաթեւիկ Խաչատրյանն ասաց, որ լրագրողները չպետք է կաշկանդված լինեն:
Արդարադատության փոխնախարար Արման Թաթոյանը չհամաձայնեց՝ ասելով. «Դուք առաջարկում եք լրագրողին մտցնել այն սուբյեկտների շարքում, որոնք չեն կարող ընդհանրապես հարցաքննվել: Համաձայն չենք սկզբունքային առումով: Սա նշանակում է, որ եթե անգամ լրագրողն ինքը գա ասի՝ ինձ հարցաքննեք, նրա ցուցմունքը չի կարող որպես ապացույց օգտագործվել եւ հաշվի առնվել»:
Կարդացեք նաև
Սակայն Արման Թաթոյանի խոսքերով. «Մարդու իրավունքների պաշտպանի զեկույցը միակողմանի է, չի արտահայտում միջազգային չափանիշները լիարժեք եւ իրականացվել է ընտրողական վերլուծություն: Մենք մանրակրկիտ վերլուծություն ենք արել եւ մեր օրենսդրական չափանիշները համապատասխանում են եվրոպական չափանիշներին: Մեր օրենքն ասում է, որ ԶԼՄ-ն պարտավոր չէ հրապարակել իր տեղեկատվության աղբյուրը: Եվ ոչ ոք չի կարող պարտադրել լրագրողին բացահայտել տեղեկատվության աղբյուրը, եթե այն անհրաժեշտ չէ ծանր կամ առանձնապես ծանր հանցագործության բացահայտման նպատակով, եթե հասարակական շահն իմանալու ավելի ծանրակշիռ է, քան տեղեկատվության աղբյուրը չբացահայտելու հասարակության շահագրգռվածությունը: Կա դռնփակ դատական նիստի հնարավորություն նաեւ: Կարող ես հարցաքննվել եւ բացահայտել, բայց եթե չես ցանկանում, դա պետք է կատարվի դատարանի որոշմամբ: Նրանց կարող է պարտադրվել որոշ դեպքերում: Որոշ երկրներում կա տեղեկատվության աղբյուրը չբացահայտելու բացարձակ իրավունք, մենք այդ ճանապարհով չենք գնում: Հաշվի առնելով վտանգը, որ լրագրողները կարող են չարաշահել իրենց իրավունքը, մենք սահմանափակում ենք դնում»:
Հռիփսիմե ՋԵԲԵՋՅԱՆ
