Լեռնային Ղարաբաղի երկրորդ նախագահ Արկադի Ղուկասյանը կիրակի` մայիսի 3-ին, քվեարկություն կատարելուց հետո, լրագրողների հետ զրույցում հույս հայտնեց, որ գնալով Ղարաբաղը կդառնա ավելի ժողովրդավարական երկիր եւ այնտեղ անցկացվող ընտրություններն էլ կլինեն օրինակելի:
Հարցին, թե հնարավո՞ր է, որ Լեռնային Ղարաբաղն անցնի խորհրդարանական կառավարման, Արկադի Ղուկասյանը պատասխանեց. «Հայաստանում նման գործընթացներ կան ու բնական է, որ դրա մասին մտածում են նաև Արցախում: Բայց կարծում եմ դեռևս շտապել պետք չէ, տեսնենք թե ինչով կավարտվի այդ ընթացքը Հայաստանում: Ընդհանրապես սա ժողովրդի որոշելիք հարցն է ու Ղուկասյանի կամ Պետրոսյանի կարծիքից չի կախված: Անձամբ իմ կարծիքը` ես կարտահայտեմ մի քիչ ուշ. կարծում եմ` հիմա դրա ժամանակը չէ»:
Հարցին, թե հնարավո՞ր է նա վերադառնա քաղաքականություն, պարոն Ղուկասյանը պատասխանեց. «Իսկ ե՞րբ եմ ես դուրս եկել քաղաքականությունից: Ձեզ թվո՞ւմ է, ես քաղաքականությունից դուրս եմ: Հիմա ես զբաղված եմ Լեռնային Ղարաբաղի հարցով և այն մարդիկ, ովքեր խոսում են, թե Ղուկասյանը Ղարաբաղում չէ` սխալվում են: Ղուկասյանը միշտ Ղարաբաղում է: Իմ ընտանիքն այստեղ է, իսկ ես և´ Հայաստանում, և´ Ղարաբաղում զբաղվում եմ Ղարաբաղի հարցով»:
Մեկ այլ հարցի, թե ինչպե՞ս է վերաբերում Սամվել Բաբայանի հնարավոր վերադարձի մասին խոսակցություններին, Արկադի Ղուկասյանը պատասխանեց. «Հիմա ի՞նչ, դուք սպասում եք, որ ուր որ է կգա՞` հինգ, վեց րոպեից: Ես լուրջ չեմ վերաբերում այդ խոսակցություններին»:
Կարդացեք նաև
Ամի ՉԻՉԱԿՅԱՆ
