Վարչական դատարանն այսօր բավարարեց ոստիկանության հայցն ընդդեմ Armenia Today կայքի համակարգող Արգիշտի Կիվիրյանի: Դատարանի որոշմամբ Կիվիրյանը վարչական պատասխանատվության ենթարկվեց` ոստիկանի օրինական պահանջը չկատարելու համար:
Սա արդեն 4-րդ վճիռն էր ընդդեմ Արգիշտի Կիվիրյանի, իսկ դատական նիստից հետո նա կրկնեց իր ավանդական դարձած նախադասությունը` Հայաստանում անկախ դատական համակարգ գոյություն չունի, դատարանները պատվեր են իրականացնում իր դեմ.
«Որեւէ այլ վճիռ սպասելն անօգուտ էր, սա հերթական վճիռն էր իմ դեմ, եւ վստահ եմ, որ միտումը շարունակվելու է»:
Արգիշտի Կիվիրյանն այս վճիռն էլ է բողոքարկելու նախ Վերաքննիչ դատարանում ու հայաստանյան դատական ատյաններից հետո արդարադատություն կփնտրի մարդու իրավունքների եվրոպական դատարանում:
Կարդացեք նաև
Հիշեցնենք, որ այսօրվա վարչական գործը վերաբերում էր 2013 թվականի օգոստոսի մեկին տրանսպորտի թանկացման դեմ պայքարի ժամանակ Կիվիրյանի գործողություններին: Նա փորձում էր քաղաքապետարանի դիմաց նստացույց անող քաղաքացիական ակտիվիստների համար վրան տեղադրել:
Արփինե ՍԻՄՈՆՅԱՆ
