«Թրանսփարենսի ինթերնեշնլ Հայաստան» կազմակերպությունն ապրիլի 30-ին հրապարակել է Հայաստանի օրինավորության ազգային համակարգի գնահատում 2014 թվականի զեկույցը: Զեկույցն արդեն երրորդ անգամ է լույս տեսնում:
Զեկույցի հիմնական հետեւություններն են, որ ի հեճուկս բավարար չափով ձեւավորված հակակոռուպցիոն օրենսդրության, առկա է լուրջ թերացում դրա արդյունավետ իրականացման մեջ: Ըստ զեկույցի՝ դատական համակարգն ընկալվում է կոռումպացված եւ ոչ ազատ իշխանությունների ազդեցությունից եւ կոռուպցիոն հանցագործությունների հետապնդումը մնում է շատ ցածր մակարդակի վրա:
Կազմակերպությունը հետեւություն է արել, որ քաղաքացիական հասարակությունը եւ ԶԼՄ-ները մնում են ամենից թույլ հակակոռուպցիոն վերահսկիչ դերակատարում ունեցող ոչ պետական կառույցները: «Թրանսփարենսի ինթերնեշնլը» համարում է, որ քաղաքացիական հասարակությունը եւ լրատվամիջոցները հիմնարար բարեփոխումների կարիք ունեն, որպեսզի դառնան Հայաստանի օրինավորության ազգային համակարգի արդյունավետ սյուներ:
Կազմակերպությունն առաջարկում է իրականություն դարձնել բիզնեսի եւ բարձրաստիճան պաշտոնատար անձանց միջեւ տարանջատումը, ուժեղացնել կոռուպցիոն հանցագործությունների հետապնդումը եւ Վերահսկիչ պալատը դարձնել ավելի անկախ՝ դիտարկելով նրա անդամներին սահմանադրական անձեռնմխելիություն տրամադրելու հարցը:
Կարդացեք նաև
Կազմակերպության գործադիր տնօրեն Վարուժան Հոկտանյանը լրագրողների հետ զրույցում հայտարարեց, որ Մարդու իրավունքի պաշտպանի ինստիտուտը Հայաստանում ամենաարդյունավետն է օգտագործում իր ներուժը՝ նպատակ ունենալով կանխել կոռուպցիոն երեւույթները Հայաստանում. «Ընդհանուր առմամբ՝ Հայաստանում լճացում է ստեղծվել: Մեր ուսումնասիրության նպատակն է ոչ թե պարզել, թե այս կամ այն հաստատությունը ինչքան է կոռումպացված, այլ՝ տվյալ հաստատությունը ինչքան ներուժ ունի կոռուպցիան կանխարգելելու համար: Ուսումնասիրության արդյունքներով այդպիսի ներուժ կա այն պետական ինստիտուտների մոտ, որոնք բավականին անկախ են եւ բավարար ռեսուրս ունեն, ինչպիսին է, օրինակ, նախագահի ինստիտուտը եւ գործադիր իշխանությունը»:
Ամի ՉԻՉԱԿՅԱՆ
