«Ժառանգության» տեսակետը մնում է նույնը`այս ոչ լեգիտիմ անձն իրավունք չունի սահմանադրական բարեփոխումներ անել: Մենք չենք մասնակցում այս կեղծ գործընթացին, որը նախաձեռնել է Սերժ Սարգսյանը եւ գտնում ենք, որ սա ուղղակի նպատակ ունի`օգնել Սերժ Սարգսյանին`վերարտադրվել»,- Aravot.am-ի հետ զրույցում ասաց «Ժառանգություն» խմբակցության պատգամավոր Զարուհի Փոստանջյանը:
Հիշեցնենք, մինչեւ մայիսի 5-ը կուսակցությունները, խորհրդարանական խմբակցությունները պետք է առաջարկներ ներկայացնեին սահմանադրական փոփոխություններն իրականացնող հանձնաժողովին`ներկայացված հայեցակարգի վերաբերյալ: ՀԱԿ-ն ի սկզբանե բացառել էր այդ գործընթացում իր մասնակցությունը:
Հարցի վերաբերյալ Զարուհի Փոստանջյանի այլ դիտարկումները տեսանյութում
Կարդացեք նաև
ԲՀԿ-ն այսօր հայտարարեց, որ առաջարկներ չի ներկայացնելու:
Aravot.am-ի հետ զրույցում ՕԵԿ խմբակցության ղեկավար Հեղինե Բիշարյանն ասաց, որ այս պահին չի կարող պատասխանել հարցին`ՕԵԿ-ն առաջարկներ ներկայացնելո՞ւ է, թե՞ ոչ: Ասաց`դեռ չենք քննարկել, բայց դա չի նշանակում, որ չեն քննարկելու: Հնարավոր է առաջիկա օրերին հարցը քննարկեն ու հստակեցնեն դիրքորոշումը: «Երբ որոշենք`ինֆորմացիա կունենաք»,- ասաց նա:
Միակ խմբակցությունը, որը առաջարկներ է ներկայացրել ՀՅԴ-ն է
Իշխող ՀՀԿ-ն նույնպես վերջնական կարծիք դեռ չի ձեւավորել: Խմբակցության ղեկավար Վահրամ Բաղդասարյանն Aravot.am-ի հետ զրույցում ասաց, որ դեռ քննարկումների փուլում են: Իրենց առաջարկների վերջնական տարբերակը դեռ կներկայացնեն: ԲՀԿ-ի մոտեցումը`առաջարկներ ներկայացնելուց հրաժարվելը, ՀՀԿ խմբակցության ղեկավարը «դա էլ է կարծիք» համարում. «Բոլորը, կարծում եմ, իրենց կարծիքը կհայտնեն`մի մասը առաջարկների ձեւով, մի մասը բանավոր: Շտապել պետք չէ»: Հարցին`խորհրդարանական համակարգի անցնելը ՀՀԿ-ի հավանությանն արժանացե՞լ է, պարոն Բաղդասարյանը պատասխանեց. «Հիմնականում, այո, հակվածությունը խորհրդարանական կառավարմանն անցումն է: Բայց մենք դեռ քննարկումների փուլում ենք, երբ վերջնական կարծիքը ձեւավորված կլինի, տեղեկատվություն կտանք»:
Նելլի ԳՐԻԳՈՐՅԱՆ
