Հայոց ցեղասպանության թանգարան-ինստիտուտի փոխտնօրեն Սուրեն Մանուկյանն այսօր՝ ապրիլի 30-ին «Հայելի» ակումբում խոսեց Հայոց ցեղասպանության 100-ամյակի շրջանակներում հյուրերի այցելությունների ու դրանց արձագանքների թեմայով: Նա հայտնեց, որ ապրիլի 24-ից Հայոց ցեղասպանության թանգարանը բաց է բոլոր այցելուների համար:
Նա տպավորված էր 4 երկրների նախագահների՝ թանգարան այցելությամբ: Սուրեն Մանուկյանի խոսքով, ՌԴ նախագահ Վլադիմիր Պուտինի հետ խոսել են Մայիսյան հռչակագրից, Ֆրանսիայի նախագահ Ֆրանսուա Օլանդին եւ Սերբիայի նախագահ Տոմիսլավ Նիկոլիչին հետաքրքրել է Մուսա Լեռան հատվածը, իսկ Կիպրոսի նախագահ Նիկոս Անաստասիադեսին՝ Զմյուռնիայի հատվածը:
Ցեղասպանության թանգարան ինստիտուտի փոխտնօրենի խոսքով, թանգարան այցելած թուրք լրագրողները «Որբերի սենյակի» հատվածում նույնիսկ արտասվել են:
Ինչ վերաբերում է նախագահներին, նրանք 1 ժամ 40 րոպե են անցկացրել թանգարանում, որտեղ կա 50 խորագիր, ու յուրաքանչյուրի մոտ 2 րոպե մնալու պարագայում՝ մոտ երկու ժամ կանցկացնես թանգարանում:
Կարդացեք նաև
Սուրեն Մանուկյանը հավելեց, որ մուտքը Ցեղասպանության թանգարան անվճար է, աշխատանքային ժամերն էլ՝ առավոտյան 10-ից մինչեւ երեկոյան 18:00-ը: Նրա կարծիքով, սակայն, ցածր տարիքի երեխաներին նպատակահարմար չէ թանգարան բերելը, քանի որ հոգեցունց ու ազդեցիկ նյութերը շատ են:
Գոհար ՀԱԿՈԲՅԱՆ
Լուսանկարը՝ Հայոց ցեղասպանության թանգարան-ինստիտուտի
