Ընկերությունը պատկանում է Մաքսիմ Հակոբյանի որդիներին
Սյունիքի մարզային քննչական վարչությունն առգրավել է Մաքսիմ Հակոբյանի որդիներին պատկանող Կապանի «Գյուղարտ» ՓԲ ընկերությունից բոլոր աշխատակիցների անձնական գործերի եւ սանիտարական գրքույկների բնօրինակները: Այս մասին «Առավոտին» տեղեկացրին ՀՀ քննչական կոմիտեից` նշելով, որ ընկերության աշխատակիցների՝ բրուցելոզով վարակվելու դեպքի առթիվ հարուցված քրեական գործով ձեռնարկվում են անհրաժեշտ քննչական եւ դատավարական միջոցառումներ` վարակի պատճառը պարզելու համար:
Ի դեպ, նմուշներ են վերցվել նաեւ սպանդանոցում կատարվող մանր եղջերավոր անասունների մորթման, մորթազերծման եւ մսամթերքի մշակման ընթացքում աշխատակիցների կողմից օգտագործվող պաշտպանական միջոցներից (խալաթ, ձեռնոց, գլխարկ, ակնոց եւ այլն):
«Առավոտն» արդեն տեղեկացրել է, որ Կապանի «Գյուղարտ» ՓԲ ընկերության սպանդանոցի աշխատակիցները` ընդհանուր թվով 18 հոգի, դիմել են բժշկական կենտրոն` բուժօգնության, եւ նրանց բոլորի մոտ էլ ախտորոշվել է «Բրուցելոզ» հիվանդություն: Նրանք նախկինում այդ հիվանդության վարակակիրներ չեն եղել եւ 2014թ. ընթացքում սպանդանոցում կատարված մանր եղջերավոր անասունների մորթման, մորթազերծման եւ մսամթերքի մշակման ընթացքում սանիտարահակահամաճարակային կանոնները խախտելու հետեւանքով են ձեռք բերել «Բրուցելոզ», որն ախտորոշվել է վերջիններիս արյան կենսաքիմիական հետազոտության արդյունքներով:
Կարդացեք նաև
«Գյուղարտ» ՓԲ ընկերության հիմնադիրներն են համարվում ՇԱՀՐ ԻՆՎԵՍՏ եւ ԼԱՄԱՔՍ ԳՐՈՒՊ սահմանափակ պատասխանատվության ընկերությունները։ Իսկ ԼԱՄԱՔՍ ԳՐՈՒՊ-ի հիմնադիրները Մաքսիմ Հակոբյանի որդիներն են։
Դեպքի առթիվ Սյունիքի մարզային քննչական վարչությունում 2015թ. ապրիլի 9-ին հարուցվել է քրեական գործ` ՀՀ քրեական օրենսգրքի 277 հոդվածի 1-ին մասով` Կապանի «Գյուղարտ» ՓԲ ընկերությունում սանիտարահակահամաճարակային կանոնները խախտելու համար, որն անզգուշությամբ առաջացրել է մարդկանց զանգվածային հիվանդացում:
18 անձինք ճանաչվել են որպես տուժող: Մեր տեղեկություններով` նրանք այդ վարակը ձեռք են բերել ոչխարներից. պարզվում է՝ ընկերության սպանդանոցում 2014թ. հոկտեմբեր-նոյեմբեր ամիսներին բրուցելոզով հիվանդ ոչխարներ են մորթվել, մշակվել: Իսկ հիվանդության ախտանիշներն ի հայտ են եկել 2015թ. փետրվարին:
Սեփ.լր.
«Առավոտ» օրաթերթ
30.03.2015
