Թուրքիայի արձագանքը Եվրոպական այն երկրներին, որոնք 1915 թվականի դեպքերը անվանում են Հայոց ցեղասպանություն, կբարդացնեն Անկարայի հավակնությունները՝ անդամակցելու Եվրոպական միությանը։ Այս մասին, ըստ «Reuters»-ի, ասել է ԵՄ ընդլայնման եւ հարեւանության հարցերով հանձնակատար Յոհաննես Հանը (լուսանկարում)։
Հիշեցնենք, որ Թուրքիան կշտամբել է ԵՄ անդամներ Գերմանիային եւ Ավստրիային այն բանի համար, որ այդ երկրների խորհրդարաններն այս ամիս 100-րդ տարելիցի վերաբերյալ բանաձեւերում օգտագործել են «ցեղասպանություն» բառը։
Յոհաննես Հանը նշել է, որ Անկարայի «շատ կտրուկ» արձագանքը պետք է հաշվի առնել հունիս ամսին տեղի ունենալիք ընտրությունների համատեքստում։ «Սա կարող է բավականին տարածվել երկրի եւ բնակչության որոշ մասերում։ Բայն այն, ինչն ինձ անհանգստացնում է, երկարաժամկետ հետեւանքներն են։ Հակաեվրոպական եւ հակաարեւելյան դիրքորոշման տնկված սերմերը այսօրվա տեսանկյունից ԵՄ մուտքը շատ են դժվարացնում»։
Պատրաստեց Աշոտ ԻՍՐԱԵԼՅԱՆԸ
