ՀՀ կառավարությունը առաջարկ կներկայացնի ԱԺ նախագահին՝ 2015 թվականի մայիսի 5-ին, ժամը 12:00-ին գումարել արտահերթ նիստ: Այս մասին որոշման նախագիծ հաստատվեց այսօր, կառավարության նիստում: Վարչապետ Հովիկ Աբրահամյանի առաջարկով արտահերթ նիստի օրակարգում տեղ կգտնի նաև «Առևտրի ծառայությունների մասին օրենքում» փոփոխություններ և լրացումներ կատարելու մասին նախագիծը, որով նախատեսվում էր, որ 2015 թվականի ապրիլի 30-ից դրոշմապիտակներով պետք է պիտակավորվեն վիտամինները, պատվաստանյութերը, դեղերը, օծանելիքը և այլ ապրանքներ:
«Դեռ աշխատանքներ կան կատարելու, գտնում եմ, որ պետք է մեկ ամիս հետաձգենք և ապրիլի 30-ը տեղափոխել հունիսի մեկով: Ես կարծում եմ, դա հնարավորություն է ՓՄՁ-ին, ովքեր ունեն ձեռք բերված ապրանքներ, բայց փաստաթղթեր չունեն: Պետք է հնարավորություն տանք, որպեսզի ՀՀ ֆինանսների նախարարությունը նոր կարգ սահմանի»,- նշեց Հ. Աբրահամյանը:
Նա նաեւ հանձնարարեց նախարարությանը՝ օրենքի փոփոխություն առաջարկել, սահմանել դրոշմապիտակավորման նոր կարգ և այն ընդգրկել արտահերթ նստաշրջանում:
ՀՀ կառավարության աշխատակազմի ղեկավար-նախարար Դավիթ Հարությունյանն էլ նշեց, որ օրակարգում ընդգրկված կլինի 12 օրենսդրական նախագիծ և 5 միջազգային պայմանագիր:
Կարդացեք նաև
Նելի ԲԱԲԱՅԱՆ
