Գրավիչ ներդրումային միջավայր ստեղծելու եւ ընդլայնելու ու ապրանքների եւ ծառայությունների առևտուրը կողմերի միջեւ դիվերսիֆիկացնելու նպատակով Հայաստանի եւ ԱՄՆ կառավարությունների միջեւ առեւտրի եւ ներդրումների մասին համաձայնագիր կկնքվի: Այդ նպատակով կողմերը մտադիր են ԱՄՆ-Հայաստան առեւտրի եւ ներդրումների հարցերով խորհուրդ հիմնել:
Այս մասին տեղեկանում ենք կառավարության կայք էջի նիստի օրակարգից: Խորհուրդը պետք է դիտանցի եւ բացահայտի առեւտրի եւ ներդրումների ընդլայնման հնարավորությունները, բացահայտի խնդիրները, աշխատի վերացնել կողմերի միջեւ առեւտրի եւ ներդրումների խոչընդոտները:
Նպատակահարմարության դեպքում խորհուրդը պետք է դիմի մասնավոր հատվածին եւ քաղաքացիական հասարակությանը` խորհրդի աշխատանքներին վերաբերող հարցերում խորհրդատվության համար:
Համաձայնագրով ամրագրված է, որ կողմերից մեկը կարող է խորհրդին դիմել առեւտրային եւ ներդրումներին առնչվող կոնկրետ խնդրով` մյուս կողմին խնդրի նկարագրությամբ գրավոր հարցում կատարելով: Խորհուրդը պետք է քննարկի խնդիրը հարցումը ստանալուն պես:
Նաեւ նշվում է, որ յուրաքանչյուր կողմ պետք է ջանա Խորհրդին հնարավորություն տալ քննարկելու խնդիրը մյուս կողմի առեւտրային եւ ներդրումային շահերի վրա ազդող գործողություն կատարելուց առաջ:
Լուսինե ԲՈՒԴԱՂՅԱՆ
