Առաջին անգամը չէ, երբ քրեակատարողական հիմնարկներից կալանավորները դատարան են բերվում ծանր առողջական վիճակով, կալանավորներին «սովորեցրած», թե ինչ ֆունկցիա պիտի իրականացնի դատարանը:
Այսպես եղավ նաեւ այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում, երբ դատավոր Մնացական Մարտիրոսյանի նախագահությամբ պետք է շարունակվեր «Աբովյան» քրեակատարողական հիմնարկի կալանավոր Վիկտորյա Մալոյանի քրեական գործով նիստը: Քրեական գործը հայտնի է «Արմավիայի գործ» անվամբ:
Վ.Մալոյանը նիստը սկսելուն պես հուզվեց, լաց լինելով ասաց, թե տարիներ շարունակ սրտի արատ ունի, մի քանի օր է՝ վիճակը կտրուկ վատացել է, այսօր իրեն այցելել է բժիշկը:
«Դա նորմա՞լ է, որ ես պետք է այս վիճակով գտնվեմ դատարանում, սպասեմ մինչեւ մյուս նիստերն էլ ավարտվեն, որ ժամը 6-ին ինձ տանեն այստեղից»,-ասաց կալանավորը, որը նաեւ հայտնեց, թե իրեն ասել են՝ դատարանում թող կանչեն շտապօգնություն:
Կարդացեք նաև
Դատավոր Մնացական Մարտիրոսյանն արձագանքեց, որ դա նրանց խնդիրը չէ, եթե դատական նիստի ժամանակ ամբաստանյալը վատանա, համապատասխան միջոցներ իրենք կձեռնարկեն:
Ամբաստանյալի պաշտպանը՝ Գայանե Գրիգորյանը չէր ներկայացել դատարան, ուստի դատավորը ամբաստանյալին բացատրեց նաեւ, որ եթե սրտի արատը հնարավոր չէ «Դատապարտյալների հիվանդանոցում» բուժել, ապա պաշտպանի հետ պետք է վիճարկեն՝ դիմելով հսկող դատախազին, արդարադատության նախարարության համապատասխան մարմնին: Կալանավորը գտնվում է Կոտայքի մարզի ազատազրկման վայրում, կարող էր, ըստ դատավորի, դիմել տեղի դատարան:
Դատավորը հորդորեց հստակեցնել պաշտպանի հարցը, քանի որ հաջորդ նիստին ամբաստանյալը պետք է ցուցմունք տար:
Ի դեպ, ամբաստանյալը երկու երեխաների մայր է, ունի անչափահաս դուստրեր, որոնք գտնվում են մոր խնամքի տակ:
Նա մեկ տարի չորս ամիս է, ինչ անազատության մեջ է գտնվում:
Ըստ նրան առաջադրված մեղադրանքի, նա զբաղվել է ապօրինի ձեռնարկատիրական գործունեությամբ:
Նա «Արմավիա» ՍՊ ընկերությունից ստացել է մի քանի խմբաքանակ արտոնյալ չվերթների ավիատոմսեր: Ստացված ավիատոմսերի դիմաց, ստանձնել էր իրականացնել ընկերության գովազդը:
Մեղադրանքի կողմի համաձայն, նա ոչ գործարքների, ոչ ավիատոմսերի ֆինանսական վիճակի վերաբերյալ հստակ իրավական, հաշվապահական ձեւակերպումներ չի կատարել, առանց պետական գրանցման է գործել, սակայն դրանից տեղյակ է եղել «Արմավիայի» վերնախավը հանձին Միքայել Բաղդասարովի:
Պատճառված վնասը կազմում է 21 641 537 ՀՀ դրամ:
Մեկ այլ դրվագով էլ՝ 18 ավիատոմսեր է ձեռք բերել, սակայն գումարը հափշտակել է:
Դատարան, ի դեպ, մի տուժող է միայն գալիս, որը պահանջ չունի ամբաստանյալից:
Ամբաստանյալն ունի թարգման:
Ռուզան ՄԻՆԱՍՅԱՆ
