«Մեր խորհրդի նպատակը ժողովրդի խոսքը տեղ հասցնելն է»,- այսօր լրագրողների հետ հանդիպման ժամանակ ասաց մտավորականների խորհրդի անդամ, Հայաստանի դեմոկրատական կուսակցության նախագահ Արամ Սարգսյանը, իսկ խորհրդի անդամ, բանասիրական գիտությունների դոկտոր, պրոֆեսոր Ազատ Եղիազարյանը շեշտեց, որ իրենց խորհուրդը քաղաքական միավոր չէ.«Խորհրդի անդամները չունեն իշխանության գալու խնդիր: Մենք պարզապես ցանկանում ենք օգնել, բարելավել մեր երկրի վիճակը»:
Խորհրդում ներգրավված են այն մարդիկ, ովքեր անկեղծ անհանգստանում են երկրի վիճակով.«Մեր դռները բաց են բոլոր մտավորականների համար, ովքեր մտահոգված են, ուզում են օգնել դուրս գալ երկրի վատ վիճակից»,- ասաց Հայաստանի հելիոֆիկացիայի ծրագրի հեղինակ Վահան Համազասպյանը:
Խորհուրդը ամեն շաբաթ կազմակերպում է նիստեր, որտեղ յուրաքանչյուր մտավորական ներկայացնում է իր բնագավառի վիճակը և հանդես գալիս իր առաջարկություններով, դրանց հիման վրա էլ նրանք կազմելու են այլընտրանքային ծրագիր և ներկայացնելու են խորհրդարան: Լրագրողի այն հարցին, թե ինչու՞ իշխանությունը պիտի լսի իրենց ձայնը, քանդակագործ Ֆերդինանտ Առաքելյանը պատասխանեց.«Կլսեն, պիտի լսեն, քանի որ մտավորականն ամեն ինչի գլուխն է»:
Մտավորականների խորհրդի անդամները համոզված են, որ իրենց շնորհիվ իշխանությունը կգտնի այն ճանապարհը, որով պետք է անցնել հաջողության հասնելու համար.«Մենք պետք է հասնենք այն մակարդակին, որ իշխանությունը փնտրի մեզ ու ցանկանա մեզ հետ համագործակցել»,- եզրափակեց իր խոսքը պարոն Առաքելյանը:
Կարդացեք նաև
Լիլիանա Օսիպյան
