Չորս քաշային կարգերում աշխարհի ութ գոտի նվաճած Վախթանգ Դարչինյանը հունիսի 6-ին ԱՄՆ-ում չեմպիոնական իններորդ գոտու համար մենամարտելու է Անդրես Քուելլայի հետ: «Առավոտը» հանդիպեց ապրիլի 24-ին Հայոց ցեղասպանության զոհերի հիշատակը հարգելու նպատակով Երեւան ժամանած անվանի բռնցքամարտիկին:
– Չեմպիոնական ո՞ր գոտու համար է լինելու մենամարտը:
– WBA վարկածի: Մենամարտելու եմ 57 կգ քաշային կարգում:
– Բայց դա քո սովորական անձնական քաշային կարգից զգալիորեն ավելի է:
Կարդացեք նաև
– Այո: Իմ անձնական քաշը 53,5 կգ է: Բայց ինչպես այս, այնպես էլ 55 կգ քաշային կարգում ոչ ոք չի ցանկանում ինձ հետ ռինգ մտնել: Փաստորեն, սա լինելու է չեմպիոնական տիտղոսի համար իմ հինգերորդ քաշային կարգի եւ չեմպիոնական իններորդ գոտու մենամարտը:
– Մեկ ամսից մի փոքր ավելի ժամանակ է մնացել պատասխանատու մենամարտին:
– Այո, ժամանակը կարճ է: Բայց չէի կարող ապրիլի 24-ին Հայաստանում չլինել եւ անձամբ չհարգել 100 տարի առաջ այս օրը իրենց բնօրրանում նահատակված մեր 1,5 միլիոն հայրենակիցների հիշատակը: Այստեղից, միանգամից կմեկնեմ ԱՄՆ կամ կվերադառնամ Ավստրալիա եւ կսկսեմ նախապատրաստությունը: Ամերիկյան հավաքներս մշտապես անցկացնում եմ Էդմոնդ Թարվերդյանի բռնցքամարտի ակումբում, որտեղ հիանալի պայմաններ են: Ի դեպ, Թարվերդյանն ու Ռոուզին միասին Երեւանում էին: Նրանց այստեղ հանդիպեցի:
– Անդրես Քուելլան մեքսիկացի՞ է:
– Այո: Նա, եթե չեմ սխալվում, իմ մեքսիկացի 15-րդ մրցակիցն է լինելու: Սիրում եմ մեքսիկացիների հետ մենամարտել: Բոլորին հաղթել եմ: Նրանց հետ մենամարտերս ստացվում են: Կարողանում եմ մեքսիկացիներին իմ մարտաոճը պարտադրել:
– Հաղթանակ ենք մաղթում քեզ:
– Շնորհակալություն:
ԱՇՈՏ ՀԱԿՈԲՅԱՆ
«Առավոտ» օրաթերթ
28.03.2015
Հաջողություններ մեր փառապանծ մարզիկին: