Սեւանա լճին վտանգ է սպառնում: Aravot.am-ի հետ զրույցում «Կանաչների միության» նախագահ Հակոբ Սանասարյանն ասաց, որ հանքարդյունաբերությունը սպառնում է լճին: Սանասարյանի խոսքերով` մոտ 16 մետաղական հանքավայրերի ուսումնասիրության եւ շահագործման լիցենզիա է տրվել, այդ հանքավայրերը Սեւանա լճի ջրահավաք ավազանում են գտնվում:
Պարոն Սանասարյանն ասաց, որ «Սեւանա լճի մասին» օրենքն արգելում է Սեւանա լճի ջրահավաք ավազանում որեւէ տնտեսական գործունեություն ծավալել, եթե այն վտանգ է սպառնում լճին.«Իսկ այդ հանքավայրերը իսկական վտանգ են, ամբողջ թափոնները ջրի եւ քամու հոսքերի միջոցով թափվելու են Սեւանա լիճ: Ես նշում եմ 16 հանքավայր, սրանք մետաղականն են, իրականում 16-ից ավելին են հանքավայրերը, որոնց մեջ նաեւ այլ տեսակի հանքեր կան»:
«Կանաչների միության» նախագահն ասաց, որ Սոթքի ոսկու հանքավայրի թափոնները Լեռնային Ղարաբաղի Սարսանգի ջրային ավազան են լցրել, սա նշանակում է, այս թափոնները կարող են հայտնվել Սարսանգի բուն ջրամբարում:
«Արարատի ոսկու վերամշակման ֆաբրիկայի պոչամբարն էլ դրված է Արարատյան դաշտավայրի արտեզյան ջրամբարի վրա, սա անթույլատրելի է, նման վայրում չի կարելի պոչամբար դնել»,-ասաց Սանասարյանը:
Կարդացեք նաև
Ըստ «Կանաչների միության» նախագահի, կառավարությունը, որպեսզի ավելի շատ հանքեր շահագործման հանձնի, միակ ջրաբանական պետական արգելավայրը 9350 հեկտարից դարձրել է 5202 հեկտար:
Գեղարքունիքի մարզի հանքավայրերը, սպառնում են Սեւանա լճին` 1.Ծարասարի ոսկու հանքավայր, լիցենզիա` 2011-2014 Պ564, «Արմենիան ինթերնեյշնլ գոլդ» ընկերություն
2.Գետիկի միջին հոսք, «Ամրոց», ոսկու հանքավայր, լիցենզիա` 2005-2013Պ 442 ընկերություն` «Գետիկ մայնինգ քամփընի»
3. Գետիկ Այգուտ, պղինձ, լիցենզիա` 2008-2013 Պ 241, ընկերություն`«Գետիկ մայնինգ քամփընի»
4. Դպրաբակի տեղամաս, ազնիվ եւ գունավոր մետաղներ, լիցենզիա` 2005-2008, ընկերություն` «Քոքսզ մեթալս ընդ միներալս»
5. Վաղաշեն, կապար, լիցենզիա` 2005-2013 Պ 356, ընկերություն`«Քանարմ փրեշս մեթլս»
6. Սոթք գետ, ոսկի, լիցենզիա`2010-2015 Պ 521, «Վեն սթեպըհեդ»
7. Մասրիկ, ոսկի, լիցենզիա` 2011-2014 Պ595, «Արմենիան ինթերնեյշնլ գոլդ»
8. Թթուջուր, երկաթ, լիցենզիա` 2012-2015 Պ 002, ընկերություն` «Ջեմ փրոդաքշն»
9. Ջիլ-ղարա, բազմամետաղային, լիցենզիա` 2012-2015 Պ 097, ընկերություն` «Ակվագեո»
10. Կողասար, ոսկի. լիցենզիա`2010-2015ՊՎ-030, ընկերություն «Արատա մայնինգ»
11. Ջիլ-Արեգունի, ոսկի, լիցենզիա` 2010-2015 ՊՎ-031, ընկերություն`«Արատա մայնինգ»
12. Վերին Շորժա, ոսկի, լիցենզիա`2010-2015 ՊՎ-033, ընկերություն`«Արատա մայնինգ»
13. Մաքենիս,ոսկի, լիցենզիա` 2010-2015ՊՎ-032, ընկերություն`«Արատա մայնինգ»
14. Թթուջուր-Ճամբարակ, պղինձ, լիցենզիա` 2008-2012 ՊՎ-064, «Լուլիար»
15. Ջիլ քրոմիտներ, լիցենզիա` 2008-2013 ՊՎ-065, ընկերություն` «Լուլիար»
16. Տիգրանաբերդ, պղինձ, լիցենզիա`2008-2012 ՊՎ-53, ընկերություն` «Լուիլար»
Բաբաջան համայնքի Սարալանջ՝ լիստվենիտներ
Շորժա՝ լիստվենիտներ
Ջիլ՝ լիստվենիտներ
Ջիլ՝ կոնգլոմերատներ
Կատարկուտ՝ գունավոր եւ թանկարժեք քարեր
Կուտական՝ գունավոր եւ թանկարժեք քարեր
Առյուծաքար՝ թանկարժեք եւ գունագեղ քարեր
Սեւան-Տրետուկի տեղամաս՝ թանկարժեք եւ գունագեղ քարեր
Թե` ի՞նչ հիմնավորմամբ է այս ընկերություններին տրվել լիցենզիա, եթե այն, ըստ պարոն Սանասարյանի «Սեւանա լճի մասին» օրենքն արգելում է: Aravot.am-ը համապատասխան գերատեսչություններին գրավոր հարցում է ուղարկել. այն ստանալուց հետո կհրապարակենք նաեւ ոլորտի պատասխանատուների տեսակետները:
Նելլի ԲԱԲԱՅԱՆ
