Այսօր ԱԺ-ում քննարկվում է «Բնակչության բժշկական օգնության եւ սպասարկման մասին օրենքում» փոփոխություն եւ լրացումներ կատարելու մասին նախագիծը:
Ինչպես ներկայացրեց առողջապահության նախարար Արմեն Մուրադյանը, նախագծով առաջարկվում է բուժաշխատողների մասնագիտական հմտությունների շարունակականությունն իրականացնելու համար ներդնել հավաստագրման համակարգ. «Հնացած եւ արդեն իրեն չարդարացրած համակարգը փոփոխության կարիք ունի»:
ԲՀԿ ղեկավար Նաիրա Զոհրաբյանը, օգտվելով առիթից, որ նախարարն ամբիոնի մոտ է, թեմային չվերաբերող հարց ուղղեց նրան. «Հայաստանում կառուցվում է Ուռուցքաբանության կենտրոն, թեեւ մենք էլ գիտենք, դուք էլ գիտեք, թե ինչ ողբալի վիճակում է ՀՀ-ում այդ ոլորտը: Բոլորս էլ գիտենք, որ չկա ՀՀ-ում գեթ մեկ քիչ թե շատ վճարունակ քաղաքացի, որ իր առողջությունը վստահի այս ոլորտի մասնագետներին: Մենք կարող ենք ունենալ շենքային առումով լավագույն կենտրոնը, բայց չունենայինք համապատասխան մասնագետներ: Վստահ եմ, վիզուալ առումով լավ շենք է լինելու, բայց ի՞նչ է արվում, որ համապատասխան մասնագետներ լինեն»:
Հետո Նաիրա Զոհրաբյանը հետաքրքրվեց նաեւ դեղերի որակից. «Հակաքաղցկեղային, քիմիոթերապիայի նույնանուն դեղերը, որոնք բերվում են Եվրոպայից, այստեղ 1-2 ընկերություն է բերում եւ որակական առումով խստագույնս տարբերվում են իրենց ազդեցությամբ»:
Կարդացեք նաև
Նախարարը պատասխանեց, որ բավականին մեծ գործընթացներ են գնում շինարարական եւ կազմակերպչական բնույթի՝ Ուռուցքաբանության կենտրոնում. «Չկա մեկ երկիր, որտեղ ուռուցքաբանության գործընթացները կանգնած են՝ հաշվի առնելով ամբողջ աշխարհում այդ հիվանդության դեմ պայքարը»:
Ինչ վերաբերում է դեղերի որակին, նախարարն ասաց, որ յուրաքանչյուր դեղ ենթարկվում է փորձաքննության. «Կիսում եմ մտահոգությունը, որ կան երկրներ, որտեղ արտադրված դեղորայքի տարբերությունը հիվանդները հստակ նշում են, բայց այս հարցին օբյեկտիվ պատասխան կարող են տալ լաբորատոր փորձաքննությունները՝ գիտականորեն հիմնավորելով: Դրա հնարավորությունն այսօր Հայաստանում կա»:
Նաիրա Զոհրաբյանի խոսքերով՝ «Հայաստանն այն բացառիկ երկրների եռյակի մեջ է, որտեղ քաղցկեղը երիտասարդացման լուրջ միտում ունի, չե՞ք կարծում, որ արդեն իմաստ ունի մտածել «Քաղցկեղի դեմ պայքարի ազգային ծրագրի» մասին: Նոր ուռուցքաբանության կենտրոնի մասնագետները որտե՞ղ են վերապատրաստվելու, մենք ունենք մասնագետների լուրջ դեֆիցիտ»:
Նաիրա Զոհրաբյանը դեղերի որակին անդրադառնալով՝ կոնկրետ օրինակ բերեց. «Խմեք Եվրոպական ցանկացած երկրից ցավազրկող Նուրոֆեն եւ առեք նաեւ մեր դեղատներից: Մեր դեղատներից առած Նուրոֆենը խմեք՝ ձեր գլխացավը կկրկնապատկվի, իսկ Եվրոպայից առածը խմեք՝ իսկապես ձեր գլխացավը կանցնի»:
Արմեն Մուրադյանն ասաց, որ հակաուռուցքային ազգային ծրագիր ներկայումս մշակվում է: Իսկ դեղերի խնդիրը բոլոր երկրներում կան, որոնց մասին կարող են խոսել «Դեղերի մասին» օրինագծի քննարկման ժամանակ:
Հռիփսիմե ՋԵԲԵՋՅԱՆ
